Hinabang ni Osmeña

Human masayri nga wa diay kasaypanan nga nahimo ang mga kadagkuan sa lungsod sa San Francisco, Surigao del Norte kalabot sa kalangan sa donasyon nga gitagana sa dakbayan sa Sugbo alang kanila, gibakwi ni Cebu City Mayor Tomas Osmeña ang iyang unang pamahayag.

Idayon na na sa mayor sa paghatag ang P2 milyones nga donasyon ngadto sa maong lungsod nga naigo sa linog, mga tulo na ka buwan ang milabay.

Nasuta man gud nga ang Cebu City diay maoy wa makaatiman nga ma- release gilayon ang hinabang, tungod kay ang pangulo sa Disaster Risk Reduction Management Office nga si Nagiel Banacia nga maoy gitahasan niini, milarga sa abroad alang sa ubang kalihukan.

Tungod niini madawat na sa San Francisco ang P2 milyones nga hinabang gikan sa dakbayan ug dili lang kay kini ra kon dili pakapinan pa ni Osmeña og ambulansiya.

Pagkabulahan sa San Francisco kay naka-ambulansiya pa gyud. Naay atong pipila ka mga barangay diha sa kabukiran nga labaw pang nagkinahanglan og ambulansiya wa mahatagi. Maayo pa ang sa laing lugar kay nakadawat pa.

Pero, sa samang higayon, gibarugan ni Osmeña ang iyang unang giluwatan nga dili niya idayon ang P10 milyones unta nga gitagana alang sa Ormoc City nga naigo usab sa linog.

Kini bisan pa man sa pagpangayo og pasaylo ni Ormoc City Mayor Richard Gomez kinsa miangkon sa ilang kasaypanan.

Pero ang nakapadugang sa intriga mao ang gisulti ni Osmeña nga iya lang ihatag ang donasyon sa Ormoc kon kini ilang mailisan ang ilang mayor.

Unsa may labot ni Osmeña sa panggobiyerno sa Ormoc? Buot ba niyang ipasabot nga dili diay ni hinabang sa kaluoy kay iya mang gipatabanan og kondisyon sa pamulitika?

Kasalikwaot paminawon.