To sir with love
Finals week ron sa eskuylahan diin nagtudlo ko sa senior high og
subjects nga may kalabotan sa media ug panuwat.
Maka- imagine lang ko sa mga estudyante nga nalumos sa tun-anan rong semanaha. Pilay subjects nila ron, unom, walo, napulo? Ug kining tanan kinahanglang tun-an. Di malikayan nga naay mabuang. Nahinumdom ko atong
mid-term exams nga dihay estudyante nga wa na gyod tingali intawoy masuwat nagbilin na lang og “love note” sa iyang exam booklet. Mao ni ang nakasuwat: “Sir, sorry kaayo way klaro akong mga answer, ikaw na bahala sir.”
Ug dihay usa nga dili ngari nako gi- address iyang love
note apan ngadto sa iyang inahan. Mao ni iyang gisuwat: “Ma, ayg kabalaka makagraduate lagi ni imong anak. Bawi ko ig semi-finals.
Love you ma!” Dili ni kausa o kaduha lang nahitabo. Katong nagtudlo pa ko kaniadto sa usa ka exclusive school for girls diri sa syudad, may estudyante nga nagtuyok-tuyok ang tubag sa
test questions. Kahibawo tingali siya nga hagbongonon siya, nagbilin siya aning siaw nga note: “Ambot na lang gyod ani akong answers sir, bangkahan na lang tika usa kiss beer.”
Naka-graduate gyod intawon tong bayhana. Ambot nag-unsa na siya ron, namaligya na tingalig beer. Di man lisod ang akong test
questions. Essay type man gani pirmi akong exam. Ug hibawo ko nga ganahan ang mga estudyante og essay type kay para nila basta may masuwat lang di gyod sila masirohan. Kana bang nagtuo sila nga mada rag ilad ang maestro labi nag gamitan og mga charchar nga mga pulong.
Ang nakaapan lang, kahibawo sila nga usa ko ka- writer ug
editor nga dili nila mailad kon panuwatay nay hisgotan.
Balik ta sa love notes. Kasabot ko sa akong mga estudyante kay nakaagi ko ani sa una. Sa wa pa ko nag-seminaryo, nag- architecture ko sa usa sa mga kolehiyo sa syudad. Nagtuo ko nga mag- drawinglang mig balay ining kursoha.
Sus naunsa ba nga pwerteng daghana man diayng math. Hate kaayo nako ning mga
subject nga naay numero. Kon tawo pa ning math gikulata na
ko ni, gidunggab, gipanitan ug gilubong nga buhi.
Dihay usa ka exam, napuno na gyod ko. Ambot sa lubot sa among maestro unsang mananapa nang differential
calculus. Ninghanap akong panan-aw nga nagtutok sa mga numero. Gikuriskurisan nako ang exam booklet ug sa ubos akong gisuwat: “Fuck I don’t need this shit!”
Ug samtang gipaningot akong mga klasmeyt og tinubag sa exam, mibarog ko ug pinabundak nga gibutang ang exam booklet sa lamesa sa among maestro nga nakuratan.
“Adto na ko noy,” ako siyang giingnan, dayong gawas sa classroom, gawas sa gates sa eskuylahan, sakay og jeep padung Mabolo ug misud sa seminaryo.