Pagtahod sa nasudnong bandera
Dunay pasiaw mahitungod sa usa ka maestra nga nibadlong sa duha niya ka mga estudyante nga babaye ug lalake nga nanag-away. Iyang gipangutana ang duha kon unsay ilang gi-awayan.
Matod pa sa babayeng estudyante, “Kini man gud si John ma’am. Iya kong gihapak sa scrub the floor maong gibunalan nako sa sweep the
floor.” Matod pas maestra, “Undanga nang inyong away kay bitayon ta unya mong duha sa flag ceremony.”
Ang matag Pilipino gipaabot nga nasayod na kon unsay buhaton kon dunay flag ceremony, ang pag-isa ug pagpakayab sa nasudnong bandila dungan sa pagkanta sa nasudnong awit.
Kinahanglan nga mobarog ka, moatubang sa nasudnong bandera ug ibutang ang imong tuong kamot ibabaw sa imong dughan hangtod nga mahuman pagkanta ang nasudnong awit.
Yuna pa, nakahibawo na ba kitang tanan sa ulohan sa atong nasudnong awit? Sa akong mga gipangutana, duna pay nitubag og “Bayang Magiliw. Ang sakto nga ulohan mao ang “Lupang Hinirang.”
Gihisgotan nato ang pagtahod sa nasudnong bandera ug nasudnong awit tungod sa pagkasikop niadtong miaging Sabado sa usa ka tawo tungod sa iyang pagdumili sa pagbarog sa dihang gitokar ang nasudnong awit sud sa usa sinehan sa Angeles, Pampanga.
Ang nakadimalas ni Bayle Einstein Gonzales, 20, kay naglingkod siya sa atubangan ni Chargé d’Affaires Elmer Cato, usa ka opisyal sa Department of Foreign Affairs.
Matod pa ni Cato, giingnan niya si Gonzales sa pagbarog sa makaduha ka higayon apan nagdumili siya sa pagbarog. Mao nga gipasikop niya kini sa kapulisan.
Si Chief Inspector Aris Gonzales, hepe sa Angeles City Police Station 4, niingon nga nakalapas si Gonzales sa Flag and Heraldic Code of the Philippines, (Republic Act No. 8491) nga nagmando nga “all persons shall stand at attention and face the Philippine flag” samtang gitukar ang nasudnong awit.
Nag-atubang siya sa multa nga gikan sa P5,000 ngadto sa P20,000 ug pagkabilanggo hangtod sa usa ka tuig.
edbarrita@gmail.com
Kinahanglan nga mobarog ka, moatubang sa nasudnong bandera ug ibutang ang imong tuong kamot ibabaw sa imong dughan hangtod nga mahuman pagkanta ang nasudnong awit.