Sometimes I look at you

Anang pagka gabii, sus nag-abot sa pagpamisita nako ang tulo ko ka mga suitors. Malipayon kaayo sila si Ronnie, Jonar ug JP. Nagdala pa silag flowers para nako. Gipatapad ko sila sa pagpalingkod sa taas nga sopa sa among sala. Kon hitsura ang hisgotan, aw, parehas silang guwapo, ug mga macho pa. Pulos pa gyud sila anak og maayong pamilya.

Gikaila ko silang tulo sa eskuwelahan. Usa ra ka university ang among gitunghaan. Nuon, lain-laing kurso ang among gikuha. Parehas mi si Jonar, third year sa college, samtang fourth year college sila si Ronnie ug JP.

“Dugay na mong nangulitawo nako, no?”

Gipahiyoman ko silang tulo. Nagkadungan silag tando.

“Mao lagi, Mona. Siyaro na man sab, uy! Wa ka pa gyuy desisyon?”

Miseryuso si JP. Mao sab sila si Ronnie ug Jonar. Mitarong kog lingkod atbang nilang tulo. Gipamatyag ko na sab ang akong feeling nilang tulo. As usual, wa koy namatikdan nga usa nila akong love.

“Sori gyud. Until now, inigsuon lang gihapon ang pagtan-aw ko ninyo. Aw, kon duna pa koy gimahal ninyo, why not? Sugton na nako, uy! But sorry gyud. Kapila ko na mo sultihi nga hunong na lang mog pangulitawo nako.”

Nagkatinan-away silang tulo. Unya mitan-aw silag dugay nako.

“Kon mao gyud nay imong gibati namo, Mona, surender na ko.”

Hilom kong nahimuot sa tubag ni JP. Naghuwat ko sa isulti nila ni Jonar ug Ronnie.

“Mao sab ko, Mona. Di na ko magsamok nimo.”

“Ako sab, Mona. Sukad karon, di na tika samuk-samukon.”

Nalipay ko sa gisulti nila ni Jonar ug Ronnie. Nakahibawo ko nga tumanon nila ang ilang giingon nako.

“Salamat nga nakasabot mo. Naa man say daghang girls, di ba? Sure gyud ko nga makakita mog labaw pa nako.” Nakig-aper ko nilang tulo. “Friend gihapon ta, ha.” Gitagsa-tagsa kog tan-aw sila si Jonar, JP ug Ronnie.

“Oo, uy,Mona. Friend ghapon ta.”

Hapit magkadungan sa pagtubag ang tulo. Unya, nananghid na sila nga mamauli.

Pagka ugma, kay Monday man, sayo kong nagmata. Ingon gyud ko ani kon tingklase, mosayo gyud kog bangon. Wa ko lang damha nga aning adlawa ikaila ko ang lalaki nga nakahatag nakog kahasol. (SUMPAYAN)