DURANT WA MAHADLOK
Warriors moasdang sa Oklahoma City karong adlawa
Gipadayag ni Golden State Warriors forward Kevin Durant nga wala siya’y bisan gamayng kahadlok sa ilang pag-asdang sa balwarte sa iyang kanhi team nga Oklahoma City Thunder karong adlawa sa National Basketball Association (NBA). Si Durant, kinsa nagpaalim
og lisa sa iyang wa nga tiil, mibalhin sa Warriors niadtong 2016 human siya nagduwa sa Thunder sulod sa walo ka mga tuig.
Sa iyang labing unang pagbalik sa Oklahoma City sa miaging season, ang kanhi MVP nagpakatap og 40 puntos taliwala sa grabeng paghasol sa mga sumosunod sa Thunder.
Ning higayuna, gituohang mao gihapon ang buhaton sa mga sumosunod sa Thunder ngadto kang Durant o kaha, basin sa mas grabe pa.
Apan alang kang Durant, dili niya kini panumbalingon hilabi na karon nga nasayod
na siya unsaon pagdala ang iyang kaugalingon ning maong sitwasyon. “It’s just a regular game for me now,” matod sa kasamtangang Finals MVP. “I learned how to tune out the crowd.”
Matod ni Durant nga ugma pa siya modesisyon kon moduwa siya sa Warriors ug nagdepende kini sa iyang pamati kabahin sa iyang angol.
“We’ll see how it feels in the morning but right now,
it feels good,” batbat ni Durant,kinsa wala moduwa sa kadaugan sa Warriors batok sa Brooklyn Nets, 118-111, niadtong Lunes.
Nagkanayon si Warriors coach Steve Kerr nga andam na si Durant bisan unsa pa’y masugatan niini gikan sa mga sumosunod sa Thunder.
“We’re a year removed from the first one so hopefully it will be a little less hostile,” matod ni Kerr. “But we’ll be ready for whatever.”
Sa laing bahin, nagkanayon ang labing sinaligan sa Thunder nga si Russell Westbrook nga wala siya maghunahuna kabahin sa pag-asdang ni Durant sa ilang balwarte.
Mas naghunahuna si Westbrook kon unsa’y ilang pagahimuon aron mohapsay ang dagan sa ilang kampanya sa paghiabot sa duha ka supersters nga sila si Paul George ug Carmelo Anthony sa ilang tugkaran. “It really don’t matter who we have next, it’s about us,” matod sa kasamtangang MVP. “Regardless of what other teams do, when we play the way we’re supposed to play for 48 minutes, it’s hard to beat us. That’s all I worry about is our team.”/