CEBU ANDAM NA KANG URDUJA

Karong buntag o hapon gibanabana sa Philippine Atmospheric, Geophysical and Astronomical Services Administration nga motugpa ang bagyong Urduja sa yuta sa Northern o Eastern Samar.

Taliwa sa hulga, ang kapulisan sa Sugbo, labina ang naa sa amihanang bahin nga mas apektado, gimandoan sa pagbantay.

Si Engr. Oscar Tabada, director sa Pagasa Visayas, nibutyag nga hangtod sa sunod semana pa masinati ang pag-ulan sa Sugbo.

Karong adlawa, matod niya, masinati ang kusog pa nga pag-ulan apan ugma, hinay ngadto sa kasarangan na, samtang sa Martes makita na ang adlaw apan dunay gamay nga pag-ulan.

Sa pagkutlo ning balita, ang bagyo katapusan nakit-an sa gilay-on nga 205 kilometros sa silangan sa Borongan City, Eastern Samar.

Si Tabada niingon nga tungod sa frontal system, ridge of high pressure area nga naa sa taas sa latitude, hinay nga nakasaka ang bagyong Urduja.

“Kini maoy nakapugong nga mosaka ang bagyo kay iduso na siya maayo sa ubos, nagtuyok-tuyok pa na siya, gasuroysuroy,” sumala niini Si Urduja nagdala sa hangin nga may gikusgon nga moabot ngadto sa 75 ka kilometros matag oras duol sa iyang sentro ug pag-unos nga moabot ngadto sa 90 ka kilometros matag takna.

Tungod sa bagyong Urduja, misaka na sa 33 ka mga sakyanan sa kadagatan ang wa makabiyahe.

Si Coast Guard Station Cebu Commander Jerome Cayabyab nibutyag nga apil sa mga biyahe nga nakansilar ang mga barko, fastcraft, ug motor banca nga padung sa Ormoc, Maasin, Bohol, mga isla sa Camotes ug Bantayan ug ubang bahin sa Kabisay-an.

Ang Provincial Disaster Risk Reduction and Management Office nakatala og landslide sa Sitio Camilyang, Barangay Labangon, lungsod sa Tabogon samtang lima ka mga pamilya ang gipabakwit sa Barangay Nahus-an, lungsod sa Sogod kay delikado sa landslide ug pagbaha, matod ni Julius Regner, tigpamaba sa buhatan.

Si Provincial Board Member Sun Shimura niingon nga way casualty sa Sogod apan dunay provincial road nga naguba base sa gipahibawo ni Mayor Seigfred Duterte.

Duna nay request sa pagpaayo sa karsada.

Samtang kapulisan sa probinsya sa Sugbo gipaalerto sa Police Regional Office 7 nunot sa nasinating bati nga panahon.

Sukad pa niadtong miaging adlaw nasinati na sa tibuok Sugbo ang ulan.

Nipagawas og kamandoan ang PRO 7 sa tanang police stations sa amihanang Sugbo nga gipaubos na sa storm signal number 1 sa Philippine Atmospheric Geophysical Astronomical Services Administration (Pagasa).

“Kon naay motawag nga mangayog tabang, we are ready to response. Naa nay PPSC sa Cebu Province nga gipa monitor sa mga lugar nga gipaubos sa signal number 1 sa Pag-asa,” nagkanayon si Tolentin.