Pipila ka mga traffic light sa Cebu City naguba

Pipila ka mga traffic light ug signs ang nangaguba nga nakaapekto sab sa dagan sa trapiko. Si Emmalinda Sarador, traffic operations officer sa Cebu City Traffic Office (CCTO), niangkon nga adunay guba nga mga traffic lights sa sentro sa Dakbayan kon diin daghan ang mangagi nga mga sakyanan.

Matod pa ni Sarador, nangaguba kini tungod sa lainlaing mga rason sama sa traffic light sa M.J. Cuenco avenue nga nasunog apan di sab sila dayon kapalit og bag-ong piyesa kay gikan sa gawas sa nasod. Mao sab sa nagubang traffic light ilawom sa overpass sa Ayala tungod kay naapektuhan sa road widening sa dan Escario. Gisulusyonan sab sa CCTO ang maong problema pinaagi sa pagdestino og mga mga traffic enforcer nga maoy modumala sa trapiko.

“Naa mi plano nga pasigaon og balik (traffic lights) pero di pa mi kaingon og kanus-a,” matod pa ni Sarador. Moduso pa sab og budget ang planning section sa CCTO aron malihok na ang pag-ilis sa mga nagubang traffic lights. Si Ernesto Morales Jr., engineering assistant, naghangyo sa mga motorista ug publiko nga di kawaton, suwat-suwatan, ug dasmagan ang mga signages nga nahimutang sa mga center island ug daplin sa mga kalsada aron mas hanay ang dagan sa trapiko ug sa paglikay sab sa mga disgrasya.

Samtang si Francisco Ouano, CCTO operations head, nag-awhag sa publiko nga i- report sa ilang buhatan kon aduna sila’y makitang mga guba nga mga traffic light o signages aron mailisan sa labing madali.