Adventure destinations alang sa lokal, millennials sa sunod nga Suroy-Suroy

Dili lang mga balikbayan ang target sa Kapitolyo sa ilang pagbanhaw sa SuroySugbo sa sunod buwan.

Sigun sa Provincial Tourism Office (PTO), buot nila nga madani ang mga millennial, lokal o langyaw nga turista, pinaagi sa ilang mga “adventure destinations”, nga gidugang sa naandan nga mga destinasyon sa kalihukan sa habagatang Sugbo.

Sulod sa pipila ka tuig, giulohan sa Kapitolyo ug Southern Getaway o Heritage Tour ang ilang pagpahigayon ug Suroy-suroy Sugbo sa southern Cebu.

Apan sa Enero 2018, gipahibalo sa PTO nga “Adventure Round South” na ang ilang giulohan niini tungod sa dugang destinasyon nga alang sa mga adventure-seekers.

Matod ni Provincial Tourism Officer Boboi Costas, dili lang mga balikbayan ang ilang target sa Suroy-suroy inig human sa Sinulog sunod buwan.

Lakip na sa ilang gitan-aw karon nga himuong participante niini ang mga millenials o batan-on nga ganahan ug adventure.

Gawas sa heritage tour sa nabantog nga mga karaang simbahan ug edipisyo sa Southern Cebu, apil na sa itinerary ang canyoneering, whale shark watching ug pagdu-aw sa falls.

Sa lungsod sa Argao buksan ang kalihukan ug lakip sa mga dapit nga duawons a 3 ka adlaw nga kalihukan ang Dalague, Boljoon, Oslob, Santander, Samboan, Ginatilan, Alegria, Moalboal, Barili ug Carcar City.

Gitakda ang Suroy-suroy sa Enero 24, 25 ug 26. Nagsugod na og dawat ang PTO ug mga inquiries ug reservation alang sa kalihukan.

Wala pa hinuon matumbok kon tagpila ang package alang niini kay nagpadayon pa sila pagsubay sa costing sa room accommodation sa mga resort nga ilang abtan.

Gidapit ang mga interesado sa pag-book o pagpanguta alang sa dugang detalye sa PTO sa Kapitolyo.