SEGURIDAD SA MISA DE GALLO HIGPITAN
Hugot nga seguridad ang ipatuman sa kapulisan sa siyudad sa Sugbo atol sa unang adlaw sa Misa de Gallo, Disyembre 16, sa kaadlawon sa tanang Simbahang Romano Katoliko sa Sugbo. Matod ni Supt. Artemio Recabo nga dunay mga gipang montar nga mga police assistance desk sa matag simbahan lakip na ang mga unipormadong police personnel isip beat patrol. Ipakatap usab ang mga mobile patrol group nga maoy mo responde kung dunay mga alarma nga mahitabo sa tibuok siyudad sa Sugbo ug mo patrolya sa kadalanan aron mahimong luwas ang mga tawo nga nagbaktas paingon sa simbahan.
Gimandoan usab sa hepe sa Cebu City Police Office (CCPO) ang mga motorcycle cops nga sakop sa Special Weapons ang Tactics nga mobahasbahas sa kadalanan sa syudad.
Awhag niya sa publiko nga sa panahon nga mosimba sa misa de gallo dili magdala ug mahalong butang ug daghang kwarta aron dili mabiktima sa mga kriminal nga mosakay sa panahon.
Alerto sa kanunay ug kung adunay mamatikdan nga dautang lihok labing maayo nga ireport dayon sa pulis nga nadestino sa sulod sa simbahan.
“Atung advice nila nga dili sila magdala ug mahalon nga butang ug daghang kwarta kay wala ta kahibalo nga sila ra ang gibantayan sa mga kawatan,” matod ni Recabo.
Gawas sa mga police ang kagamhanan sa siyudad sa Sugbo mopakatap usab ug mga ambulansya gikan sa kabarangayan alang sa mga nanimba nga nakasinati ug kalipong sa suod sa simbahan.
Ang Police Regional Office 7 mosangon sa mga Chief of Police nga mohatag ug mensahe sa mga simbahan atol sa misa de gallo kini tipik sa programa sa kapulisan nga transformation program ug mohatag ug advice nga magbantay sa mga kriminal.
Matod ni Supt. Reyman Tolentin, Information Officer sa PRO-7 nga lakip ang kapulisan nga seryuso ang kapulisan sa pagpatuman sa balaod.
Gidasig usab sa PRO-7 nga ilakip sa mensahe sa mga police atubangan sa mga manimbahay ang pagsunod sa espiritohanon nga aspeto.
Gimandoan na usab sa PRO-7 Director ang tanang police stations lukop sa rehiyon nga isaka ang alert status sa unang adlaw sa misa de gallo.