Trabaho sa Cebu-Cordova Link Expressway

Moabot sa 800 ngadto sa 1,000 ka mga trabahante ang gikinahanglan sa pagtukod sa ikatulong taytayan sa Sugbo o Cebu-Cordova Link Expressway. Si Ruben Camba, authorized representative sa Cebu Link Joint Venture (CLJV), nibutyag nga manguha sila og mga trabahante gikan sa siyudad sa Sugbo, lungsod sa Cordova ug kasikbit nga mga lugar sa Kabisay-an aron motabang pagtukod sa taytayan.

Apil na niini ang mga trabahante gikan sa ubang mga nasod ug mga mamumuo sa DM Consunji Inc., ug First Balfour Inc.

Ang CLJV kay consortium sa Acciona Construccion SA nga nagbase sa Espanya, DMCI ug First Balfour Inc. nga pulos nagbase sa nasod nga maoy napiliang motukod sa CCLEX. Kini ang gihatagan sa P22.6 bilyones nga design ug build contract sa Metro Pacific Tollways Corp. niadtong Huwebes atol sa kalihokan sa Waterfront Hotel and Casino, dakbayan sa Sugbo.

Ang kalihokan gisaksihan ni Presidential Adviser on Legislative Affairs Adelino Sitoy, Cordova Mayor Mary Therese Sitoy-Cho, Cebu City Mayor Tomas Osmeña ug uban pa. Si Rodrigo Franco, presidente ug chief executive officer sa MPTC, niingon ang pagkuha og mga trabahante dili lang kutob sa konstruksyon sanglit mag- hire usab sila og mga engineer ug office staff sa pagdumala, pag- operate ug pag- maintain sa pasilidad sa higayon mahuman ang pagtukod niini.

Sumala ni Camba, ang proyekto makatabang sa ubang patigayon sama sa suppliers, subcontractors ug ubang negosyo nga malambigit sa konstruksyon ug operation ug maintenance.

Si Franco niingon pahibaanan sa mga sakyanan nga moagi sa CCLEX kay magsugod sa P89 ug mag-agad sa klase ug gibug-aton. Ang 8.5 kilometros nga CCLEX maoy unang toll road expansion sa Visayas ug Mindanao.