Amahan gikan sa party, patay sa bangga sa Mandaue

Usa ka 35 anyos nga amahan kinsa gikan nitambong sa company Christmas party ang namatay human nabangga ang motorsiklo niini sa nag-urong nga dump truck sa dalan AS Fortuna, Barangay Bakilid, dakbayan sa Mandaue kagahapon sa kaadlawon.

Patay na nga napadangat sa tambalanan si Adones Obiña, minyo, lumad sa Hipodromo, dakbayan sa Sugbo.

Matod ni PCInsp. Mercy Villaro nga kuyog ni Obiña atol sa insidente ang iyang 9 anyos nga anak nga lalake atol sa aksidente ala 1:30 sa kaadlawon.

Sumala ni Villaro nga sa pakighinabi sa mga imbestigador sa anak ni Obiña, kini nagkananyon nga gipugngan iyang amahan sa kauban sa trabaho nga di una papaulion sanglit delikado nga magdrayb siya nga nakainom.

Apan wa matod pa nagpapugong si Obiña.

Sa inisyal nga imbestigasyon, ang mag-amahan nabangga sa Isuzu dump truck kinsa gidrayban ni Rodel Cometa, 39, taga Tabugon, ebu.

Base imbestigasyon sa kapulisan nga nipasok sud sa naka- parking nga truck ang motor ni Obiña.

Daling gidala sa tambalanan ang mag-amahan apan wa na matabang sa doktor ang amahan nga nagrabihan nunot sa kakusog sa impact sa aksidente.

Kasamtangang nagpaalim sa tambalanan ang anak ni Obiña.

Sa laing bahin, kritikal sab ang usa ka 38 anyos nga lalake human nga kini maligsi og dumptruck sa dihang kalit milabang sa Avenue gahapon sa kaadlawon.