I hate everything about you
MIisayo man gud kog anhi sa simbahan aron makalingkod ko sa sulod. Misayo sab diay si Rennan. Diri gyud tupad nako siya molingkod. Aw, naghuot na nuon ang mga tawo sa sulod sa simbahan niadtong tungora. May gani nakalingkod pa ko. Unya kay huot man man ming naglingkod sa taas nga lingkoranan duol sa altar, nagkadikit gyud ang among lawas ni Rennan.
Usahay gani magkasaghid ang among mga bukton. Nagkusmod lang ko. Wa gani ko motan-aw kang Rennan. Makalagot man gud, sakitlang sa dughan nako ang akong dakong pagtuo nga bayot si Rennan. Kinsa man say di sakitan nga mi-admire man ko sa iyang kaguwapo ug ka-macho? Unya diay, berdeg dugo.
“Nasuko ka ba nako, Malou?”
Wa ko motubag. Wa pa magsugod ang Santos nga Misa niadtong tungora. Gisiko kog hinay ni Rennan aron kaha pagkuha sa akong pagtagad. Hapit ko na lang siya singkahan sa iyang gibuhat nako. Apan nagpugong ko sa akong kaugalingon kay daghang tawo ug naa mi sa sulod sa simbahan.
“Naunsa ka ba? Ayaw og siku-siko diha!”
Bisag naglagot gyud ko kaayo kang Rennan apan gihinay ko ang akong tingog. Gipakita ko lang niya nga nasuko ko pinaagi sa ekspresyon sa akong nawong. Gikusmoran gyud nako siya. Wa ko mobawos sa iyang pagsmile nako.
“Nagselos ka namo ni Clarissa, no, Malou?”
Gisigahan ko si Rennan sa akong mga mata. Misamot ang kalagot ko niya. Sa akong kasuko, hapit ko na lang siya tulisuka. Wa na gyud ko makapugong sa akong kalagot niya.
“Nganong magselos man ko? Unsay labot ko sa imong kinabuhi, ha, Rennan?”
Giduot ko ang akong tudlo sa agtang ni Rennan. Nananaw ang mga tawo sa sulod sa simbahan kanamo ni Rennan. Nauwaw ko kaayo. Nagdali kong migawas ug didto na magtindog sa kilid sa simbahan duol sa dagkotanan sa mga kandela. Mao say pagsulod sa pari sa altar. Gisugdan dayon niya ang Santos nga Misa.
Wa ko mahimutang sa akong gitindogan. Wa masulod sa akong ulo ang giwali sa pari dihang nag-homily na siya. Ang akong kalagot kang Rennan maoy nagpasulabi sa akong hunahuna. Selos gud tawon! Nganong magselos man ko? Nagyawyaw ko nga mao rang usa.