BIADO KAMPYON

Gidugang ni Carlo Biado ang iyang pangalan sa listahan sa Filipino billiard legends pinaagi sa paglangkat sa korona sa 2017 World 9-Ball Championship sa miaging gabii sa Al Arabi Sports Club sa Doha, Qatar.

Gimakmak ni Biado ang kababayang si Roland Garcia sa

all-Filipino finals, 13-5, aron angkunon ang titulo.

Ang 34 anyos kinsa lumad nga taga La Union nahimong ikalimang Pinoy nga nahimong world champions sunod nila ni Efren “Bata” Reyes, Francisco “Django” Bustamante, Ronnie “Volcano” Alcano, ug Alex “The Lion” Pagulayan.

Taodtaod na sab nabakante ang Pilipinas sa titulo ning maong torneyo, nga gisalmutan og 128 ka mga magduduwa gikan sa kapin sa 40 ka mga nasod.

Sa press released nga gipagawas sa World Pool Billiard Association, nagkanayon si Biado nga dako niyang garbo nga nahilakip siya sa tapok sa mga Pinoyng bilyarista nga nahimong world champions.

Alang kaniya, tubag kini sa iyang dugay nang pangandoy ug bunga sa grabe niyang paningkamot.

Si Biado sayong miarangkada ug nakaposte kini og 7-0 nga bintaha sa race-to- 13 nga dinumbolay. Ang maong labaw tungason na alang kang Garcia.

Gipasabot ni Biado nga wala siya gibati og pressure sa duwa ug kampanti ra siya gumikan kay bisan mapakyas siya, usa lang gihapon ka Pinoy ang makabira sa world title.

Ning maong kalampusan, nakabulsa og $30,000 si Biado samtang nakadawat si Garcia og $15,000. Ang torneyo nagdalit og kinatibuk-ang $200,000 nga ganti.