LBJ MILEKSIYON SA LA LAKERS
Warriors midabo-dabo sa Mavericks
Girehistro ni LeBron James ang iyang ika-59 nga triplearon tabangan ang host Cleveland Cavaliers sa pagpukan sa Los Angeles Lakers, 121-112, kagahapon sa National Basketball Association (NBA).
Ang four-time MVP nagpakatap og 25 puntos, 12 rebounds ug 12 assists aron tablahan si Larry Bird sa ikaunom nga dapit sa padaghanay og triple-double nga namugna sa usa ka magduduwa.
Ang Cavaliers, nga ningposte sa ika-10 nilang sunodsunod nga kadaugan sulod sa ilang balwarte, ningsaka sa 21-8 nga rekord samtang ang Lakers ningkanaog sa 10-17 nga baraha.
Ang pambatong rookie sa Lakers nga si Lonzo Ball igo na lang sa pagbilib kang James, kinsa iyang gikonsiderar nga labing maayong basketbolista sa kalibutan.
Mao kini ang labing unang higayon nga gikaharong ni Ball si James.
“Watching him doesn’t do him justice,” matod ni Ball. “He has that size, that speed. I’d say he’s the best player in the world right now.” Si Ball dugay na nga nag-ido- lo kang James ug gisundo’g sa kanhi UCLA star ang estilo sa dinuwaan gikonsiderar nga hari sa basketball.
Sa iyang bahin, nipabuhagay sab si James nga nakadayeg siya ni Ball, kinsa gawas sa opensa niini, maayo sab kini mopasa sa bola.
“It’s always team,” tubag ni James sa pangutana kon nganong ganahan siya ni Ball.
“He passes the ball. Pushes the ball up the floor. Someone you want to play with. This is a team game. Everyone gets so caught up in this whole individual thing and it’s, the whole team game gets overlooked, but then, I’m not going to go there.”
Ang Cavaliers gipangulohan ni Kevin Love pinaagi sa iyang 28 puntos samtang nidugang og 17 puntos si Jose Calderon.
Ang Lakers gipangulohan ni Brandon Ingram pinaagi sa iyang 26 puntos, nitunol og 20 puntos si Kyle Kuzma samtang niamot og 13 puntos ug 10 rebounds si Ball.
Sa laing gikaintapang duwa, ang host Golden State Warriors ningpukan sa Dallas Mavericks, 112-97, bisan kuwangan sila og mga haligi.
Ang Warriors ningkombati nga wala sila si Stephen Curry, Draymond Green, Zaza Pachulia ug Nick Young apan nasugakod gihapon nila ang Mavericks.
Gipangulohan ni Kevin Durant ang defending champions pinaagi sa iyang 36 puntos samtang nitampo og 25 puntos si Klay Thompson lakip na niini ang lima ka triples.
Sa lain pang mga sangka, ningdaog ang Detriot Pistons batok sa Atlanta Hawks, 105-91, New York Knicks batok Brooklyn Nets, 111-104, ug Minnesota Timberwolves batok Sacramento Kings, 119-96.