SuperBalita Cebu

LUBONG NI CAMOMOT UGKATON SA ENERO

-

Forensic expert sa Public Attorney’s Office (PAO), Dr. Erwin Erfe, ang mangu sa pag-ugkat ug pag-eksamin sa nahabilin nga bahin sa lawas ni anhing Arsobispo Teofilo Camomot.

Si Padre Mhar Vincent Balili, vice postulator sa kawsa pagpabayaw pagkasanto­s ni Camomot, nibutyag nga usa ka anthropolo­gist si Erfe nga nagbase sa kaulohan.

“Kinahangla­n siya og expert kay majority sa part sa iyang (Camomot) lawas bones naman,” pamulong niini.

Sa Enero 3 ug 4 gitakda ang pag-ugkat ug pagbalhin sa lubong ni Camomot gikan sa kasamtanga­n nga lubngangan niini ngadto sa Domus Teofilo, ang museum nga gitagana alang sa nipanaw nga obispo sud ra usab sa Daughters sa St. Therese (DST) Mother House sa Barangay Valladolid, Carcar City.

Si Cebu Archbishop Jose Palma nibutyag nga paspas ang proseso kang Camomot diin nitugot ang Congregati­on for the Causes of Saints sa diocesan process alang sa kawsa pagbayaw pagkasanto­s sa Sugbuanon nga arsobispo nga naila sa pagkamangg­ihatagon ug pagkamahig­ugmaon sa kabos.

Niadtong Marso lang ning tuiga o tangkod pito ka buwan dihang giduso ang diocesan process sa Roma.

Sa Enero 3, himuon ang pag-ugkat ug pag-eksamin sa unsay nahabilin sa lawas ni Camomot, nga molungtad og labing dugay walo ka oras.

Sugdan kini og misa nga pangulohan ni Palma kauban sa Board of Consultors sa artsidyose­sis sa Sugbo, DST ug mga kabanay ni Camomot.

Sumala ni Balili apil sa mga rason sa pag-abli sa lubnganan ni Camomot ang pagsukod kon pila ang gitas-on ug kon unsay estado sa nahabilin nga lawas.

Si Balili nipaambit nga nisugyot si Padre Samson Sillorique­z, ang main postulator sa kawsa ni Camomot, nga magkuha og bahin sa nahabilin nga lawas niini aron maoy dad-on didto sa Roma.

“Para dili na mag-abli abli, magdoble, magkuha na lang daan kay dili i- expose ang iyang lawas kay dipi pa man siya santos,” dugang ni Balili.

That’s why I am happy about it. Kay kon atong tan-awon, ang proseso padayon, we’re closing in to the dream nato. Akong joke ni Fr. Mhar, “Fr. Mhar bisan ma-blessed lang siya no lipay nako pero pa santosa lang jud siya, Fr. Mhar,” - asoy ni Palma.

Newspapers in Cebuano

Newspapers from Philippines