SOCIAL WORKER ‘MIABUSO’ SA 7 KA MENOR

3 ka kaso gipasaka, apil na ang rape

Usa ka social worker gikan sa Mandaue City Social Welfare and Service Office (CSWS) ang gitaktak sa trabaho ug gipasakaan og mga kasong rape, acts of lasciviousness, ug child abuse human masakpi nga nimolestiya sa di mominos pito ka mga batang lalake sa Hope of Mandaue Enhanced (Home) Children’s Center.

Giingong manghilot ang suspek sa iyang mga bata, kinsa adunay gipangmu sa lawas atol sa managlahing mga hitabo niadtong milabay nga buwan.

Gihimakak ni Marlon Cabiging, 38, ang mga pasangil batok niya sa dihang gikomprontasi siya sa CSWS officer-in-charge nga si Jessie Perez. Apan giangkon ni Cabiging nga iyang giuyab ang usa sa mga bata, 13 anyos, kay dako siya og gusto niini, matod pa ni Perez sa pakighinabi sa Superbalita Cebu.

Sa mga nabiktima, unom niini ang mga menor de edad diin ang labing bata nag-edad og 11 anyos samtang usa niini ang bag-o lang nag-18 anyos.

Usa ka 13 anyos nga biktima sab ang nagkanayon nga giuyab siya sa suspek tungod kay di buhian iyang kamot kon di siya sugton samtang laing 16 anyos nga biktima ang niingon nga gipanamastamsan ug giduwaan iyang pagkalalake bugti sa P40.

Matod ni Perez sa CSWS nga ang social worker si Cabiging, kinsa taga Brgy. Jabogiao, Mandaue City, usa ka tutor sa mga bata sa maong pasilidad.

Kagahapon sa hapon, pormal na nga gipasaka ang tulo ka mga kaso batok sa social worker.

GIPAHILOT

Si Perez nagkanayon nga nasakpan si Cabiging sa iyang binuhatan sa dihang usa sa mga bata ang nisumbong ngadto sa nagdumala sa pasilidad kalabot sa pagpangabuso.

“Gihilot niya ang mga bata. So, unom sila kabuok (ang gihilot). Ang common nila nga

reason kay gihilot sila because mura bitaw sila og naglain ilang paminaw, unya kay house parent lagi. Pero siya nga house

parent, assigned siya sa mga tutorial sa mga bata. Mao ra gyud na iyang trabaho. Gi- instructionan gyud na siya sa amoang HOME Center head nga kon unsay imong assignment diha ra ka. You’re not allowed to touch

anything about anang mga bata,” matod ni Perez.

Dugang niya nga sa pagpanghilot ni Cabiging, manghikap siya sa pribadong parte sa lawas sa mga bata.

MGA HITABO

Unang insidente nahitabo niadtong Nobiyembre 16 sa udto diin si Liam (di tinuod nga ngan), kinsa bag-o lang nagsaulog sa iyang pagka-18 anyos, gihilot sa iyang “Tita Marlon” human nisakit iyang ulo.

Hapit masumbagi ni Liam si Cabiging human manghikap sa iyang kinatawo, maayo na lang kay giuwang siya sa gwardiya.

Tungod sa hitabo, gitug-an ni Liam ang insidente ngadto sa tagdumala sa pasilidad nga si Maricel Yu.

Nitug-an usab ang biktima nga kuyog sa iyang kauban sa center, gipatan-aw sila og law-ay nga salida sa cellphone ni Cabiging.

Pagka-hapon sa samang adlaw, ang 11 anyos nga si Mar (di tinuod nga pangan) nagpahilot na sab ug gihikap ni Cabiging sud sa classroom human naglain ang lawas niini kay gihilantan.

Pagka-ugma, si Luis (di tinuod nga ngan) ang nabiktima na usab ni Cabiging.

Mga alas 10 niadtong Nobiyembre 19, ang 13 anyos nga si Richard (di tinuod nga pangan) ang giingon nga gipanamastamasan sa suspek sud sa ilang library.

GIUYAB

Sumala pa ni Richard kinsa gi-uyab sa suspek nga gigunitan iyang kamot sa library ug sila nagka-uyab tungod kay namugos niya si Cabiging ug di buhian niini ang kamot kon di siya mosugot niini.

Sa wa pa usab nahitabo ang insidente anang adlawa, si Richard niingon nga gipasaka sila sa suspek sa second floor sa pasilidad sa iyang mga kauban ug gipasud tagsa-tagsa, sa iyang pagsulod, gihikap matod pa iyang kinatawo.

Sumala ni Perez nga human nila mahinabi ang upat, wa na nila pangutan-a sa hitabo ang 14 anyos nga si Jon ug 12 anyos nga si Chris (mga tinuod nga ngan gipugnan).

Nahibaw-an ni Perez ang pagpangabuso niadtong Nobiyembre 21 ug nianang adlawa, gi-pull-out sa trabaho si Cabiging ug niumol og investigation

team ang CSWS kalabot sa mga insidente sa pagpangabuso.

Niadtong Disyembre 11, ang mga social worker gikan sa DSWD, mga psychologist, taga city legal office ug si Perez personal nga nihinabi sa mga bata kinsa nisaysay sa ilang nahi-aguman gikan ni Cabiging.

NANGHIMAKAK

Pagkagabii, si Perez nagkanayon nga ilang gikahinabi si Cabiging kalabot sa mga pasangil sa mga bata apan nihimakak kini pag-una, apan sa pagpangutana kalabot ni Richard nga iyang na-uyab, diha na kini niangkon sa iyang sayop ug dakong gusto sa maong bata.

Niadtong Biyernes, sa dihang nagkuha og affidavit ang mga pulis gikan sa mga bata ang 16 anyos sab nga si Ruel ang nitug-an sa kapulisan nga usa ka higayon, nakighilawas kaniya si Cabiging bugti sa P40.

Paambit ni Perez nga tungod sa hitabo, gipaubos na nila ang mga bata og stress debriefing sanglit kini na- trauma sa hitabo.

Tungod sab niini, ipaubos ni Perez og re-organization ang HOME Center ug balikon sa pag- orient ang mga staff sa ilang trabaho.

“Before hiring someone, they should know the policy. We will also train our house parent in the proper handling of children, residential training for staff and social working and we are going to formulate child protection policy in our traning,” ni Perez sa mga tigbalita. Adunay 30 ka kawani ang CSWS sa maong pasilidad nga adunay sud nga 75 ka mga bata diin 14 niini mga children in conflict with the law ug 20 ka children at risk. /