Operasyon batok drugas subsob na
Sugod karong semanaha, subsub na ang kampanya sa kapulisan sa tibuok rehiyon siyete batok sa ilegal nga drugas human sila hatagi na usab ug pagtugot ni Presidente Rodrigo Duterte nga molusad og anti-drug operation.
Gipaubos una sa seminar batok sa pagtamod sa tawhanong katungod ang mga sakop sa Drug Enforcement Unit sa dili pa sila molusad sa anti drug operation.
Matod ni Chief Supt. Jose Mario Espino nga sama sa ilang gihimo sa nanglabay nga mga buwan diin walay mga nakalas kung walay drug personalities nga mosukol sa kapulisan mao usab ang ilang buhaton karon.
Tungod niini, gisaad ni Espino nga karong semanaha dunay subsub nga kampanya ang mga sakop sa DEU sa tanang police office inabagan sa Philippine Drug Enforcement Agency kun PDEA-7.
Dunay mga kausaban sa pagpatuman sa ilang anti drug operation kini sama sa pagpahibawo sa PDEA usa ka oras sa dili pa ang operation kung ang ilang subject usa ka high value target.
Estrikto karon ang kapulisan sa ilang pagbalik sa gubat batok sa ilegal nga drugas sama sa pagsunod sa police operational procedures, pagtamod sa tawhanong katungod ug uban pa.
Kung ang ilang operasyon makapatay sa drug personality nga misukol sa mga police diha-diha dayon molusad ug imbestigasyon ang PRO-7 aron masuta kinsa ang nakapusil ug unsa nga armas ang gigamit niini.
“Every time na mayrong death in police operation the police officer involve will be subjected for further investigation so diretso na, to explain why it led to death in police operation,” matod ni Espino.
Gisaad usab sa heneral nga abli sa publiko ang ilang imbestigasyon dihadiha dayon kung giunsa sa pagpusil sa pulis ang drug personality.
Awhag sa PRO-7 sa mga target sa anti drug operation nga motahan nalang sa kapulisan ug dili mopakita ug pagsukol aron dili sila madisgrasya.
Dili maglisud ang kapulisan ning ilang pagbalik sa kampanya batok sa ilegal nga drugas sanglit nagpadayon ang gihimong monitoring sa PNP ug sa PDEA-7.