PAG-ANTOS NI MOMMY ROSE
Napakyas siya sa pagkab-ot sa iyang unang damgo. Apan bisan pa sa dagkong mga babag, nipadayon siya sa pagpakigbisog.
Si Rosita Casipong, 53, gusto unta nga mahimong doktora apan wala niya makab-ot ang maong pangandoy gumikan sa mga sirkumstansya ug desisyon nga iyang nahimo.
Apan wa man tuod niya makab-ot ang iyang damgo sukad sa bata pa siya, si Mommy Rosita ( tawag sa mga tawo nga iyang suod) malipayon na sa iyang kinabuhi kay ang iyang mga anak pulos na niya napalampos isip mga nurse.
Una siyang nitaak sa Carbon niadtong 1979 kuyog sa iyang mama nga si Remedios Villaver aron motabang sa pagpaninda og utanon ug prutas.
Paglabay sa duha ka tuig, ni-enroll siya og preparatory course sa University of the Visayas apan nimabdos siya sa iyang kamaguwangang anak nga si Irene Rose Yenco.
Si Irene usa na ka nurse ug tua na nagbase sa California sa United States of America.
Gumikan sa iyang gidangatan, wa na siya nipadayon og tungha ug nibalik og paninda sa Carbon niadtong 1983 pinaagi sa pagtinda og mani.
Apan asoy ni Mommy Rosita, kanunay mangasaba kaniya ang iyang inahan hinungdan nga siya nakahukom nga makigiminyo kang Nickomedes Casipong, kinsa nanguyab niya apan wa pa niya gisugot, aron lang makabaton og pamilya ug sa ingon makalikay na siya sa iyang inahan .
Ang ilang kaminyuon nagbunga og upat ka mga anak, ang tulo pulos mga nurse nga silang Nick Me Rose, Honey Bee ug Sweet Rose samtang si ug Aljun Dim, usa ka driver.
Gusto unta niya nga usa sa iyang mga anak ang mahimong doctor, apan gusto nila kutob ra sila sa pagka nurse.
Nagtuo si Mommy Rosita nga nindot ug malipayon na ang dagan sa ilang pamuyo tungod sa maayong negusyo nila sa pagpaninda og mga utanon ug prutas samtang ang iyang bana driver sa delivery van.
Nakatabang kanila ang pagpaangkat kaniya sa usa ka negusyante nga Insik nga iyang gitawag og Noy Paul.
Gibaligyaan siya niini og tag usa ka container van nga singkamas ug okban nga nakapalambo kanila og maayo.
Nakapalit siya og duha ka mga maanindot nga PUJ, tricycle ug motorsiklo tungod niani.
Apan niabot ang labing dako nga krisis sa iyang kinabuhi. Ang iyang bana kinsa mao say nag-drive sa jeep, nakauyab og batan-on nga estudyante ug ni- adtong 1996, siya nakadesisyon nga mobiya sa iyang bana.
Gipadako ug gipatungha ni Mommy Rosita ang iyang lima ka mga anak nga wala magsalig sa ilang amahan hinungdan nga grabe ang iyang kayod sa Carbon, aron lang mahalin ang iyang mga tinda.
Uwan ug init ang iyang giantos, diin matag karon ug unya, maigo sila sa demolition sanglit kaniadto bisan asa ra sila maninda.
Iyang gisaysay nga dihang nag-abot sa kolehiyo ang iyang duha ka mga anak ug tag P30,000 ang bayranan matag semester, nadiindiin siya og panghuwam, apan gibuligan ra gihapon siya Kahitas-an.
Ang iyang unang anak nga si Irene Rose, maoy mosalbar niya kanunay sa panahon nga nagsangkiig siya sa mga bayranan.
“Pero pagkakaron, malipayon na kaayo ko kay nahuman na sila og eskwela ug sama ra nga naibtan kog tunok kay bisan kon wala silay amahan ug sa mga problema nilampos sila” padayag ni mommy Rosita, kinsa opisyal na karon sa Alliance of Energetic Vendors Association Inc. (AEVAI) nga adunay kapin 1,000 ka miyembro.
Sa dalan Progreso sa Carbon ang iyang pwesto, diin sila namaligya og ahos, sili atsal ug espada, repolyo, tamatis, sayote, dulaw, luy-a, carrots ug patatas.
Karon malipayon na siya sa iyang pagpaninda ug sa pagpuyo uban kang daddy William Gomez nga maoy iyang kaabag sa adlaw-adlaw nga paningkamot sa pagpaninda pangandam sa adlaw nga ganahan na siyang moundang sa pipila na ka dekada niyang panginabuhi aron tagamtamon ang katam-is sa kalampusan human sa iyang mga pag-antos. /