Bodyguard ni Lagon

Kasalikwaot ning gihimo sa usa ka bodyguard sa dakong pulitiko sa lungsod sa Tuburan nga nakapaalibwag sa mga kustomer sulod sa usa ka bar sa Cross Roads sa Barangay Kasambagan, dakbayan sa Sugbo niadtong Sabado sa kadlawon. Ang gitumbok kining usa ka bodyguard ni Daphne Lagon, ang higpit nga kaatbang ni Mayor Aljun Diamante sa niaging piniliay, nga giingong mipasalba sa iyang pistola nga gitumong sa sawog.

Tungod sa kalisang ug pagkatibuwaag sa sa mga kustomer daghang mga nangabuak sulod sa bar ug dako-dako gyud ang danyos nga namugna niini.

Ang bodyguard giila nga si Rey Arban, 40, nga taga Malusgod, Duneas, dakbayan sa Ilo-ilo kinsa gitanggong karon sa Mobolo Police Station, posibling mag-atubang og pipila ka mga kaso. Mora og dunay salo-salo kining pundok ni Lagon niadtong higayona kay, matod pa, moabot og kapin sa 20 man ka mga tawo ang ilang kuyog atol sa maong hitabo.

Pipila ka gutlo human sa hitabo daling mipalayo si Arban apan nahikatulog kini sa taksi tungod sa kahubog gihatod kini sa driver sa Mabolo Police Station diin didto usab nagkaabot ang mga nireklamo batok kaniya.

Personal man tuod ning kabuang ni Arban apan kay lagi pulitiko man ang amo, di nato kalikayan nga masakyan gyud kini og pulitikanhong isyu.

Wa pa gani makalingkod ang iyang amo pagka mayor, nagpakita na sa iyang pagka taras. Unsa pa kaha og anaa na sa puwesto? Hinaot nga patagmon ug di unta ni labanan ni Lagon ning ingon aning klasi sa iyang mga tawo.

Ning bag-o lang, ang kampo ni Lagon gideklarar sa korte nga mao gyud ang tinud-anay nga mananaog sa miaging eleksiyon apan wa kini maka-asumir sa puwesto tungod kay nakakuha man og temporary restraining order (TRO) si Diamante.