Samad nga ginudnuran og asin

Mibisita nako sa GMA 7 broadcast complex niadtong miaging semana ang babayeng kawani sa Kapitolyo nga mireklamo og sexual harassment case batok ni Provincial Disaster Risk Reduction Management Office (PDRRMO) chief Baltazar Tribunalo. Nangayo siya og advise nako kon unsa ang angayan niyang buhaton human gibali-wala lang sa Provincial Women’s Commission (PWC) nga gipanguluhan ni Vice Gov. Agnes Magpale ang iyang reklamo.

Naghilak intawon siyang misugid kanako sa iyang kasinatian human mibuto sa media ang iyang reklamo batok ni Tribunalo. Sa ilang buhatan, gilikayan na siya sa iyang mga officemates nga morag adunay mananakod nga sakit. Dili na modungan og kaon ang uban og molikay na niya. Nahadlok sila nga maduhig sa maong isyu kay basin og initan pod sila ni Tribunalo nga maoy ilang hepe kaniadto sa Provincial Environment and Natural Resources Office (Penro). Nahimong officer in charge si Tribunalo sa Penro.

Nahisagmuyo ang babaye kang Magpale kay gilingkuran lang ang iyang reklamo. Gipatawag siya ni Magpale kausa ra diin nag-abot sila ni Tribunalo. Human ato, wala na ug hangtod karon wala na siyay update kon ila bang resulbahon ang iyang reklamo. Giingnan pa man gani siya ni Magpale nga gipa- background investigation sa NBI 7.

Ngano god nga ipa- background investigation nga siya man maoy complainant. Ang mas sakit mao ang paghingalan kaniya ni Gov. Hilario Davide III nga “disgrasyada.” Miangkon siya nga aduna siyay anak pero wala sila makasal sa iyang live-in partner kaniadto. Ngano man diay og disgrasyada, wala na ba diay siyay katungod nga moreklamo human siya binoangi sa iyang superior? Daw samad unya ginudnuran pa gyud og asin. Nagplano siya nga modangop ngadto sa Ombudsman.

Di pa igo, wala na sab siya irekomendar sa iyang hepe karon sa Penro nga i-renew ang iyang kontrata isip job order employee. Nakapangutana siya nga ingon ana ba diay ang polisiya sa Davide administration nga kon moreklamo ka, ikaw naman hinuon ang gukdon. Mga walay kalooy.

(bobbygnalzaro@