Mga guba nga dalan
ISYU? Gipadako sa mga kritiko ni Presidente Duterte ang gamay nga butang ug gihimo nga isyu ang dili angayan sama sa pictorial sa iyang apo nga si Isabella Duterte didto sulod sa Malakanyang nga mag-debut na.
Gani, bisan kinsa mahimo man magpictorial didto sa gawas sa Malakanyang. Ang apo na hinuon ni Presidente Duterte ang di mahimo? Mora og sagrado ang Malakanyang sa tan-aw sa mga kritiko ni Presidente Duterte.
Mogawas na hinuon nga ang mga kritiko kon kontra sa pulitika ni Presidente Duterte nahutdan na sila sa mga lihitimo nga isyu batok kaniya kay gidaginot ning isyu nga walay labot ang katawhan. Pagpuyo mo oi!
URDUJA. Nindot nga pangan apan dako ang kadaut nga nahiagoman sa mga dapit sa Leyte, Biliran ug Samar sa iyang pag-agi niadtong Sabado ug Dominggo nga nagdala grabe nga uwan ug hangin.
Natala nga 31 na ang patay sa mga dapit sa naagian sa Bagyo Urduja. Ang Probinsya sa Biliran dako ang kadaut nga nasinati. Sa taho ni Biliran Gob. Gerry Espina, Jr., sa iyang interview sa radyo, ang tanan tulay sa Biliran naguba sa makusog nga bul-og sa tubig sa mga sapa.
Pasalamat ta sa Labaw nga Makagagahum nga luwas ang dakbayan sa Sugbo sa maong katalagman. Bisan tuod naigo sa makusog nga unos ang bahin sa norte sa Cebu apan walay natala nga kadaut sama sa Biliran.
Si Daanbantayan Mayor Vicente Loot nakahatag na og 1,000 nga food packs sa mga mibakwit. Apan mipalanog og kahigwaos si Mayor Loot tungod kay dili abtik ang lihok sa ahensya sa gobyerno sama sa DSWD.
Mayor Loot, di na man ikahibung ang kahinay sa aksyon sa DSWD. Unta nakaandam na sila usa ka semana sa wa pa moabot si Urduja kay nakita na man ni sa Pag-asa. Ang mga LGU di dapat magsalig sa mga ahensya nasyonal.
GUBA. Nisamot kaguba ang mga dautan nga dalan sa dakbayan sa Sugbo sa pag-abot ni Bagyo Urduja, nga mibuhos og uwan nga way undang-undang niadtong Sabado ug Dominggo. Miulbo og maayo ang kaspa ni Torni Frank Malilong atol sa iyang programa sa dyCM (1152AM), “Frankahay Ta”, kay misamot kaguba ang dalan sa Sambag1.
Di lang sa Sambag 1 ang dautan nga mga dalan. Hapit tanan dalan sa hilit nga dapit sa dakbayan sa Sugbo mga gubaon na. Di ko motuo nga way pundo ang siyudad alang pagpaayo ning mga guba nga dalan.
Mahibung ta nga ang kontra partido ni Mayor Tomas Osmeña sa konseho sama nila ni Konsehal Joel Garganera, Raymond Garcia, Joey Daluz, Joy Pesquera ug Jun Alcover nagpakahilum man lang sab sa mga guba nga dalan. Maayo tingali ang dalan sa ilang dapit.