Federalism mobwelo sayo sa 2018

Duha ka dakong hitabo kabahin sa pederalismo ang wala mabantayi sa media sa miaging Disyembre 9, 2017 ug tungod niini nagtuo ko nga mobwelo kini karong bag-ong tuig.

Una, nitambong si Speaker Bebot Alvarez sa nasudnong mobilisasyon sa Kilusang Pagbabago aron ilusad ang giingong anti-poverty program sa administrasyon ni Presidente Duterte nga gitawag og Biyaya Ng Pagbabago.

Wala hatagi og pagtagad sa lokal nga media ang pag-abot sa delegasyon gikan sa Luzon dinhi sa Sugbo nga gisugat og kapin sa dos mil ka mga tawo diha sa Cebu City Hall.

Online, nag- post si Mayor Tomas Osmeña sa iyang mensahe alang sa maong programa nga gipangusgan ni Cabinet Secretary Jun Evasco.

Apan didto na sa Syudad sa Davao, si Speaker Alvarez mismo nitambong sa maong mobilisasyon nga walay hakot di sama sa nahitabong kalihokan sa miaging Nobiyembre 17 dinhi sa Sugbo.

Sa iyang pamulong, nagkanayon si Speaker Alvarez nga target sa Kongreso nga magplebisito na alang sa bag-ong Konstitusyon dungan sa eleksyon sa barangay ug Sangguniang Kabataan (SK) sa umaabot Mayo 14, 2018.

Sa ingon, magsugod na sa pagpakanaog sa federal system karong Mayo 2019. Moabot og 50,000 gikan sa Luzon, Visayas, ug Mindanao ang mga lider ug sakop sa Kilusang Pagbabago ang naminaw ni Alvarez ug gipaabot nga molihok alang sa pederalismo.

Ikaduha, nagpundok ang mayoriya sa mga mayor sa lalawigan sa Sugbo nga gipangulohan nilang Sec. Adelino Sitoy, iyang anak nga si Cordova Mayor Therese Sitoy, Tuburan Mayor Aljun Diamante, ug kanhi Naga mayor Val Chiong aron maporma ang Cebuano Movement for Federalism (CemFed).

Kining maong grupo sakop sa National Alliance of Movements for Federalism Inc. nga gipangulohan ni Metro Manila Development Authority (MMDA) chairman Danny Lim.

Si Diamante, nga presidente sa League of Municipalities of the Philippines (LMP) Cebu ug executive vice president sa NAMFed, mao ang presidente sa Visayas Alliance of Federal Movements.

PDP-Laban

Kon atong aninawon pag-ayo, kining mga mayor nga sakop sa CemFed mga kanhi sakop sa Liberal Party ug Nacionalista Party nga nanghurar sa PDP-Laban sa miaging buwan.

Nagpasabot ba kini nga mobuwag sila kang Gob. Junjun Davide nga gituohang mokampanya batok sa giduso sa administrasyon? Duna bay sakop sa One Cebu sa maong pundok?

Nagpasabot ba kini nga ang CemFed motumaw nga lahi nga sentro sa politika dinhi sa Sugbo? Kinsa man ang yawe nga personalidad sa maong grupo? Si Diamante? Si Sitoy? Maka-intriga alang kanako labi na nga si Sitoy mao ang labing dako nga Sugboanong opisyal sa official family ni Presidente Duterte. @anol_ cebu sa Twitter