Star Wars lingaw unta pero dragging
Taas kaayo ang “Star Wars: The Last Jedi” nga nidagan sa 2 hours and 32 minutes. Sa fans sa maong intergalactic
franchise, tingali nalingaw ani labi na nga nibalik ang orihinal nga si Luke Skywalker (Mark Hamill). Daghan sad ang nagatang kon unsay nahitabo sa karakter ni General Leia nga gidala ni Carrie Fisher, nga wa katiwas sa maong lilas kay namatay sayo karong tuiga.
Apan kadtong wala kasunod sa pelikula sa Star Wars nga unang nigawas niadtong 1977, siguradong maglibug sa estorya kay daghan siyag plot ug storylines.
Kon wa mo kasunod, maorag di sad mo ka- appreciate, labi na sa mga millenial!
SUPER TRAFFIC
Niadtong Sabado, maorag usa to sa kinagrabehan nga traffic nga akong nasinati karong tuiga.
Nigikan ko sa Liloan alas 3:40 sa hapon, alas 6 na lang sa kilumkilum wa pa gihapon nitugpa ang akong gisakyan sa SM City Cebu. Grabeha.
Tungod tingali kay daghang Christmas party, daghang sale, naa pay Urduja, ang resulta: daghang nangatanggong sa traffic.
Imbes padung unta ko sa Christmas party sa Superbalita, wala na lang ko modayon kay grabe sad kuno ang traffic padung Colon. Makaluya. Makasapot. Makagutom. Didto na lang ko nihabhab sa Sunburst. Kan-on pa beh! Huh!
BIRTHDAY GIRL
Ugma, tulo ka party ang akong tambungan, usa ana birthday party.
Mosayo na lang gyud kay basin mababoy na sad ta. Ang problema og parehog hunahuna nato ang tanang tawo nga mosayo sad sa ilang lakaw. Wa gyud tay dag-anan.
Basin di ko katunga kay matraffic na sad, mo- greet na lang mi daan nimo Ma’am Gladys Gochan, ang rayna sa Cebu’s Original Lechon Belly, og happy
birthday nga magselebrar sa iyang adlawng natawhan ugma. Yehey!
MAZDA CAR
Naa pa diay laing bagyo moabot, ug kusog pa kuno sa Urduja, si bagyong Vinta, karong Sabado, Disyembre 23.
Nangimbitar ra ba si Ma’am Rosemarie Gaisano anang adlawa sa unang grand raffle
draw sa ilang A Million Thanks Promo kay ihatag na ang una sa tulo ka mga brand new Mazda
car. Ang bola himuon sa parking lot sa Country mall with special guest performer Mark Neumann (La Luna Sangre star).
Mag-ampo lang ta mausab ang hangin ni Vinta ug dili na madayon aron happy ang tanan sa pasko. Merry Christmas!