Interbyu ni Lolo Atoy

Way magdahom nga usa ka gatos na ang edad ni Lolo Atoy tungod sa himsog pa niyang panglawas. Labong pa ang hamis ug itom niyang buhok, morag gisyampuhan kanunay og gogo. Lab-as pa ang iyang mga mata, sama sa bag-ong nakubit nga isda. Ang barog mora pog SAF nga sundalo. Maayo pa siyang mo- jumping jack. Lig-on pa sab ang iyang mga ngipon sama sa gorilla. Gikagubtan siya sa Media. Ang kamatuoran niini iyang gidala-dala, birth certificate niya: Born in August 28, 1917.

“Unsa ang mga pagkaon nga gikaon diay nimo, Lo, nga taas man kag kinabuhi?”matod sa usa ka batan-on ug guwapa nga reporter.

“A, di man sad ta ganahan motubag anang imong tinawgan nako, Inday!” komedya ni Lolo Atoy.

“Aw, Sir diay! Unsay mga pagkaon imong gikaon, Sir, nga taas man kag edad?” sa dalagang reporter nga nagngisi.

“A, mokaon man kog bisan unsa. Basta pagkaon lang nga di makahilo.”

“Di ka moinom ug sigarilyo, Sir?” sa reporter.

“Di man tingali na mainom ang sigarilyo, Day. Yupyupon man na,” guwatsi sa tigulang.

“I mean...” nahikatawa ang reporter, “di ba ka moinom og ilimnong makahubog ug moyupyop og sigarilyo?”

“Inom ko, uy! Mo-sigarilyo pod! Pero pang-tsiks lang. Kon naay guwapa ba!”

“A!” miyango-yango ang reporter. “Sa tan-aw nimo, Sir, unsa may sikreto o hinungdan nga taas man kag kinabuhi?”

“It’s not about the secret or hinungdan, but ang Ginuong Diyos ray magbuot sa tanan!”

“Unya, unsa may buhaton nimo anang nadawat nimo nga P100,000 gikan sa City Hall?”

“Ipalit og asawa!” ginuwatsi nga tubag ni Lolo Atoy.

“Unsay wish nimo sa imong birthday, Sir?”

“Tagaan unta sa Ginuo og taas nga kinabuhi ug nga abtik kanunay ang panglawas.”

“Sugot ka, pun-an pag laing 100 years to live?” “Sugot kaayo!” “Lami pa ang mabuhi, Sir?” “Puwerting lamia! Labi nag mobarog pa ning akoa...” ni Lolo Atoy nga gisundan sa iyang pag-ubo.

“Aylag binastos, Sir, kay daghan ra bang nagbasa.”

“Bastos ba god na kon mobarog pa ang akoang mga tiil aron makasuroy-suroy pa ko sa mga nindot nga mga palibot?”

“Butbot! Nganong wa man nimo lahusag estorya?”

“Nakakita bitaw kang giubo ko. Nasud-ipan ko sa akong laway!” lusot ni Lolo Atoy nga misampong sa iyang tuong kamot sa iyang baba. (KATAPUSAN)