San Pascual hari sa CEPCA Grand finals

Mikawat og dakong atensyon si Jerry San Pascual human niya giharos pagdaog ang tanan niyang mga tahas aron angkunon ang titulo sa Group B sa Cebu Executives and Professionals Chess Association (CEPCA) Grand Finals and Non-Qualifiers Tournament niadtong Dominggo sa gabii nga gipahigayon sa panimalay ni CEPCA president Engr. Jerry Maratas sa Cebu Royal Estate sa lungsod sa Consolacion, Cebu.

Si San Pascual miposte og prepektong 9.0 puntos sa single-round Swiss system tournament aron dominahon ang iyang kategoriya.

Ang mga nabiktima sa singot sa utok ni San Pascual mao sila si John Velarde, Roel Hortelano, Mario Bustillo, Jun Kidlat, Joe Atillo, Manny Abucay, Percival Fiel, Eddy Flores ug Martin Kwan.

Miangkon sa ikaduhang luna mao si Martin Sean Kwan, kinsa nakaposte og 8.0 puntos, samtang ang nikuha sa ikatulong dapit mao si Percival Fiel, kinsa adunay 6.5 puntos.

Milangkat sa titulo sa Group A mao si Yves Fiel.

Nagtabla sila si Fiel ug Rogelio Enriquez nga pulos nakahipos og 4.0 puntos human sa 5-round Swiss event apan pinaagi sa winner-over-theother, midakin-as si Enriquez sa ikaduhang luna.

Milabni sa ikatulong dapit mao si Zilverstein Torres, kinsa adunay 3.0 puntos. Samtang sa Non-Qualifiers event, giangkon ni Vince dela Torre ang titulo pinaagi sa iyang 5.5 puntos, ikaduha si Solon Bagalihog, kinsa adunay 4.5 puntos, ug ikatulo si Engr. Maratas.

Gihulagway ni Maratas ang 2017 nga usa ka malampusong tuig alang sa ilang asosasyon.

“It’s a very succesful year for CEPCA. Naa ta’y minor ug major tournaments, naa ta’y programs for chess development ug nakapatukod ta og chess center sa Argao as part of our social responsibility,” matod ni Maratas.