Milendo determinado
Molarga na karong Disyembre 26 (liwas Pasko) ang team ni International Boxing Federation (IBF) junior flyweight world champion Milan Melindo sa Japan alang sa iyang unification fight batok ni World Boxing Organization ( WBA) champion Ryoichi Taguchi nga gikatakda karong Disyembre 31, didto sa Ota-City General Gymnasium sa Tokyo, Japan.
Kon unsa ka andam si Melindo ning maong awaya, siya ug ang iyang trainer ray nahibawo ug sila mismo sayod kon unsa kalisod alang ni Melindo si Taguchi tungod kay usa man usab kini ka world champion. Gawas niini, di nato masalikway ang homecourt advantage sa haponanon kinsa adunay 26-2-2, 12KOs nga baraha, kay lagi anaa man sa ilang teritoryo ang away.
Hinuon kon eksperiyensya ang hisgutan, mas taas si Melindo og kasinatian kay may 37-2-0, 13KOs nga baraha. Di man tuod kini maoy igong basehan, apan makatabang kini sa iyang determinasyon.
Dili bag-o alang ni Melindo ang pag-away sa ubang nasod kay nalukoplukop na man ni siya og panulong. Ikaduha pa ni niyang away sa Japan pero ang iyang makapakaging nga 1st round
knockout nga kadaugan batok ni Akira Yaegashi sa ilang
world title fight niadtong May 21, ning tuiga, makapataas sa iyang moral.
Mao nga ang Japan maoy iyang paboritong nasod kay didto man niya malangkat ang iyang unang world title human sa duha niya ka pagsuway nga gihamok siyag kapakyasan.
Pero batok ni Taguchi morag dakong hagit kini ni Melindo tungod kay mismo ang iyang trainer nga si Edito Villamor dili makapaniguro.
Sa akong pakighinabi sa akong kumpareng Edito, iyang giingon nga kinahanglan matumba o kaha ma-knockout ni Milan si Taguchi aron malikayan ang kontrobersiyal nga desisyon.
Iyang giangkon nga lisod man tuod apan matod niya nga dako siya og pagsalig
ni Milan tungod sa determinasyon niini.
“Taas niya og gamay, pero Milan is a warrior. Gusto gyud niya nga modaog kay mao man niya iyang dream nga ma unify ang tanang belts sa 108. We believed sa iyang capability to win, like what he did to Akira Yaegashi,” matod ni Villamor kinsa kanh two-time world title challenger.
Kini maoy ikaduhang pagdepensa sa 29-anyos nga Melindo sa iyang titulo human sa iyang split decision nga kadaugan batok ni Hekkie Budler niadtong Sept. 16, pero ikapito na usab kini nga pagdepensa sa 30 anyos nga Taguchi. Goodluck, Milan.
junmigs0622@yahoo.com