Angkas Padala, naa na sa Sugbo; LTFRB mipahimangno sa publiko

Nipahimangno ang Land Transportation Franchising and Regulatory Board (LTFRB) 7 nga ilegal kining gihimo karon sa pipila ka Angkas bikers nga nagdala og pasahero sa pagbalik sa Angkas sa Sugbo.

Niadtong Martes lang sa udto dihang hingpit na nga nagsugod ang Angkas Padala nga usa na ka serbisyo sa Angkas nga modala og package/parcel pinaagi sa pag- book online.

Kining pamaagi usa ka Transport Network Vehicle Service (TNVS) ubos sa Transportation Network Company niini nga Angkas.

Gihunong sa Angkas ang serbisyo niini nga susama sa habal-habal tungod kay giisip kini nga illegal sa LTFRB.

Si LTFRB 7 regional director Ahmed Cuizon nibutyag sa Superbalita Cebu kagahapon nga gimonitor na kini nila atol sa pagsugod sa maong serbisyo sa Sugbo.

“Yes, their transporting of passengers is still illegal,” si Cuizon nagkanayon.

Niadtong Martes dihang gisuwayan ning mantalaan nga mosakay sa usa sa Angkas Padala biker ug nakasakay kini.

Hinuon nipahibawo ang driver daan nga di kini pwede base na usab sa ilang pamaagi sa Angkas Padala.

Si Arnel Tancinco, executive assistant ni Mayor Tomas Osmeña nga gitahasan niining transportation network sa Sugbo hilabi na sa habal-habal, nagkanayon nga gusto sa mayor ang plataporma sa Angkas.

Karon naghuwat pa sila sa proposal sa Angkas alang sa Siyudad ug kon unsaon nila nga mamahimong makabalik sa syudad.

“The mayor really is very interested in operating the platform sa Angkas.”/