■INILUGAY:

Mga pasahero nga nagsugod na sa pagpanguli kagahapon sa hapon alang sa nagkadaiyang mga dapit sa lalawigan sa Sugbo, Kabisay-an ug Mindanao nag-inilugay sa pagsakay sa bus. Naninguha sila nga makauli aron di matanggong samtang nagpadung ang usa ka low pressure area nga gituohang mahimong bagyo ugma.

Uwanon ang pagsugat sa Sugbo ug ubang bahin sa Kabisay-an sa Bag-ong Tuig gumikan sa low pressure area nga naa sa Mindanao, sumala sa Philippine Atmospheric, Geophysical and Astronomical Services Administration.

Si Joey Figuracion, weather specialist sa Pagasa Visayas, niingon nga kagabii gipaabot nga mosud sa Philippine Area of Responsibility (PAR) ang LPA ug ugma ma-develop kini ngadto sa pagka tropical depression.

Kon kini mahitabo, ang LPA tawgon og “Agaton,” ang unang bagyo sa nasod sa 2018.

Ang LPA katapusang nakit-an sa gilay-on nga 1,175 kilometros sa silangan sa Mindanao.

Si Figuracion namahayag nga base sa ilang pagbanabana, ang LPA motugpa sa yuta sa Eastern Visayas o Eastern Mindanao sa hapon sa Lunes o sayo nga buntag sa Martes.

Ang epekto niini, uwanon ang Sugbo ug ubang dapit sa Visayas sa Enero 1 ug 2.

Siya nidugang ang epekto sa LPA magsugod ugma sa gabii.

Matod ni Figuracion apil sa senaryo nga ilang gibantayan nga kon moagi sa Mindanao ang LPA ug kusog ang amihan, kini mapakusog nga magdala og kusog nga hangin ug mga ulan.

Kon kusog ang hangin, apil sa maapektuhan ang kadagatan diin modagko ang mga bawod.

Si Provincial Disaster Risk Reduction and Management Officer Baltazar Tribunalo niingon nga bisan kon layo pa ang LPA angay nga mangandam ang mga local government unit pinaagi sa pag-alerto sa mga molupyo nga naa nanimuyo sa mga dapit nga kuyaw sa mga pagbaha ug landslides.

Suma pa niya angay tamdan sa mga opisyal sa kabarangayan ang hazard maps nga ilang giapud-apod aron paglikay sa katalagman. /