Baex bldg., mga ospital prayoridad ni Davide

Nag-unang mga prayoridad ni Gob. Hilario Davide III sa tuig 2018 ang pagpatukod na sa bag-ong Bureau of Agricultural Extension (BAEX) building sulod sa Capitol compound.

Lakip sa dugang kalambuan sa pasilidad ug serbisyo sa duha ka provincial

hospitals sa amihanan ug habagatang Sugbo.

Matod ni Gob. Davide, dugay rang giplanohan ang maong mga proyekto ug buot niya nga makita na ang katumanan niini sa tuig 2018, sa dili pa usab maabtan sa election period sa tuig 2019. Sigun sa gobernador, ang bag-ong BAEX building mao na unya ang mo-house sa moderno nga pasilidad ug buhatan sa Provincial Disaster Risk Reduction and Management Office (PDRRMO). Samtang sa tuig 2018, mas nindot nga building, mga kahimanan, dugang personnel ug serbisyo ang makita sa Cebu Provincial Hospital sa siyudad sa Carcar ug Danao City.

Gipasabot ni Davide nga ang maong mga tambalanan himuon nga catchment area sa mga pasyente sa kalungsuran, aron dili na sila kinahanglang dalhon sa mga tambalanan sa dakbayan sa Sugbo.

Gitug-an sa gobernador nga nakahimo na siya og assessment kauban ang mga department head ug mga sakop sa Hunta Probinsiyal sa Kapitolyo. Matod niya, walay nausab sa ilang direksiyon sa umaabot nga tuig ug mao kini ang paghimo og dugang trabaho alang sa pag-serbisyo.

Gihulagway ni Davide nga maayo ang mga nahitabo sa

provincial government sa tuig 2017. Kini nunot usab sa mga pasidungog ug pag-ila nga nadawat sa Kapitolyo nunot sa giingong maayo nga pagdumala sa iyang administrasyon.

Lakip sa gipasigarbo sa gobernador mao ang lain na usab nga Seal of Good Local Governance nga nadawat sa Kapitolyo gikan sa Department of Interior and Local Government (DILG) ug ubang pasidungog gikan sa Civil Service Commission, Department of Environment and Natural Resources (DENR) ug uban pa.

Gipasigarbo sab niya ang pagsaka sa kita sa probinsiya, nunot usab sa taas nga koleksiyon gikan sa nagkadaiyang economic enterprise sa Kapitolyo.

Nagpasalamat si Davide sa mga department head tungod sa pagkugi niini alang sa pagpadangat og serbisyo sa mga Sugbuanon ingun man kang Bise Gob. Agnes Magpale ug sa board members nunot sa pagpasar og mga reolusyon ug mga ordinansa nga gikinahanglan usab sa probinsiya ug sa mga konstituente niini.

Dili hinuon makatumbok ang gobernador og “dagko” nga mga proyekto nga iyang nahimo sa tuig 2017.