Bag-ong tuig, bag-ong paglaum

Inig hagtok sa taknaan sa alas dose karong gabii, ato nang kompletong biyaan ang tuig nga lumalabay, 2017 ug gakson ug hangpon ang bag-ong tuig, 2018. Igo na lang kita sa paghandum ug paghanduraw sa tuig nga milabay kay matod pa dili man puwede natong hikalimtan ang atong mga kasinatian sa tuig nga milabay labi pa ang mga halandumon ug malipayon nga kasinatian.

Ang mga mapait nga kasinatian og mga kapakyasan dili na nga angayan pang handumon gumikan maghatag lang kini og sakit sa dughan dala ang panghinaot nga dili na kini masubli sa umaabot nga katuigan. Kon unsa man ang nagpaabot kanato sa sa umaabot nga tuig, ang Labaw’ng Makagagahum lamang ang bugtong nasayod. Atong isalig kaniya ang tanan inubanan sa atong mga pag-ampo nga unta hatagan kita og igong grasya.

Matod pa sa Chinese horoscope, ang 2018 mao ang Year of the Dog. Ug kay kita matuhu-tuhuon man mao nga ang hiyas sa iro atong ika-kumpara sa kinabuhi sa tawo. Unsa man ang mga hiyas sa iro? Loyal nga hayop sa nagbuhi kaniya. Di ba gi-ingon nga ‘dog is man’s best friend’. Usa ka maayong higala.

Usahay masugo sa ilang mga amo. Makabantay sa panimalay kon wala ang ilang amo. Sa tanang mga hayop, ang iro maoy daling matudloan og mga tricks sama anang gigamit sa mga circus. Nindot kaayong buhion. Siguro halos tanang banay dinhi sa Pilipinas aduna gyoy binuhi nga iro.

Ug gumikan kay loyal man ang iro, posible nga mao usab kini ang hiyas sa mga tawo nga matawo ning maong zodiac sign. Loyal sa asawa o hiniguma, loyal sa kaminyuon, sa profession ug tinuhuan.

PAHIMANGNO

Kay lagi mahiligon man kita sa pagsaba-saba pinaagi sa pabuto inig sugat nato sa Bagong Tuig unyang gabii, bisan kon gidili na kini, ato lamang pahimangnoan ang naghupot og mga armas de fuego nga dili gyud magpabuto sa ilang mga armas. Gumikan kay kon magpabuto kamo, posible ang usa ka bala, mokutlo kana og kinabuhi. Dili kita gusto nga adunay magbangutan sa pagsugat sa Bag-ong Tuig.

Happy New Year sa tanan!