Mga Kausaban sa 2018
Sugod pa lang sa Sinulog karong Enero, daghan na kitang mapaabot nga mga kausaban. Kay kanus-an man nahitabo sa miaging katuigan nga moestrikto na ang lagda nga walay inom mga 300 metros gikan sa Sinulog parade.
Kanus-a sab nahitabo nga walay namaligya og bisan pagkaon – ilimnong makahubog pa kaha -- sa Fuente Osmeña? Karon pang Sinulog 2018.
Hinuon, mahimong mosulod sa Fuente Osmeña aron mopasiyo ug pagpahayayay gawas sa kahuot kon motan-aw sa parada.
Ang mangitag pagkaon, mahimong moanha sa mga stall dapit sa DOH ug kining mga kananan diha sa Maxilom Avenue.
Kay subra man sa 300 metros ang Plaza Independencia gikan sa parada, busa mahimo diha mopalit og beer dayon akong nasabtan nga mag-concert pa gyud ang mga iladong banda sa Manila ug Sugbo.
Laing dapit alang sa gusto mahubog ug mag-kiat mao ang SRP.
Atong nasayran nga gawas pa niini, dunay dugang pa nga atong mapaabot karong umaabot nga Sinulog.
PEDERALISMO
Apan mas mahinungdanon nga kausaban nga mahitabo karong 2018 mao ang pagpangusog sa administrasyong Duterte nga maduso ang pederal nga sistema sa pangagamhanan.
Nagkanayon si House Speaker Bebot Alvarez atol sa paglusad sa Biyayang Pagbabago program sa kagamhanan nga ilang paninguhaon nga mapahigayon ang plebisito alang sa bag-ong pederal nga Batakang Balaod.
Gipaabot nga mahuman dayon sa Constitutional Commission (ConCom) ang draft sa Batakang Balaod ug kini mapaapruban sa Constitutional Assembly (Con Ass) sa labing daling panahon.
Ang target nga madungan ang plebisito sa piliay sa barangay karong Mayo 2018 aron masugdan na sa pag-implementar kini sa Mayo 2019.
STRATEHIYA Nagkanayon si Mayor Aljun Diamante sa Tuburan nga iyang giduso kang Speaker Alvarez ang stratehiya nga ang mokampanya alang sa bag-ong konstitusyon mao ang mga mayor.
Kahinumdoman, si Diamante nibiya na sa Liberal Party (LP) ug nitapon sa PDP-Laban.
Mao kini ang ideya luyo niining iyang gitukod nga Cebu Movement for Federalism (CemFed) nga ubos sa National Movement for Federalism nga gipangulohan ni MMDA chairman Danny Lim.
Isip chairman sa League of Mayors of the Philippines (LMP) sa Visayas, dako og papel si Diamante niining maong stratehiya dinhi sa Visayas.
Gipaluyohan kini sa mga personalidad nga di sab basta-basta sama nilang Mayor Cho-Sitoy sa Cordova ug kanhi mayor Val Chiong sa Naga.
Kon madayon kining maong plano sa administrasyon, mausab gyud ang dagan sa politika sa tibuok nasud labi na diha sa pagpili og mg senador ug sa state governor.