Nganong ga MTB ko

Dunay pipila nako ka mga higala sa biking community mangutana nganong wa ko magpalit og road bike. Duna koy pipila ka mga rason kon ngano, bisan tingali kon duna koy igong kwarta, di ko mopalit og road bike.

Una, nganong mopalit man ko sa biseklita nga di ko ganahan? Nakat-on ko og biseklita sa road bike, apan di ko ganahan. Kay lagi kabus ug hinuwaman ra nako ang biseklita, wa koy laing mahimo, nitindak ko aron makat-on og biseklita kaniadto.

Ikaduha, nagdako ko sa kabukiran. Ganahan ko og lugar nga maka-commune ko og nature. Kana bang makahanggap ko og preskong hangin, makalantaw sa nagbawod nga kabukiran ug makatimaho sa baho sa kakahuyan. Sa road bike, di ko na mahimo.

Sa klase sa atoang kadalanan sa kabukiran, ang eksperto ra sa biseklita ang makahimo tingali sa pagmaneobra sa lisod nga mga agianan. I don’t claim I am a skilled rider. Nabunal gani ko sa road bike nga naa lang sa naandan nga karsada, unsa na kaha kon sa kabukiran pa ko?

Ikatulo, sa ako nang giingon, ang atoang mga karsada kuyaw. Gikan sa south ngadto sa north, uneven ang surface sa atoang mga karsada. Magsakay gani ka og four-wheel nga sakyanan, maka-feel ka sa pag-untol-untol. Di kini maayo. Kon dangog ang dalan labina panahon sa ting-uwan, dunay dakong possibility nga ikaw ma-slide, labina kon dunay gagmay nga mga bato sa kadalanan.

Nipis kaayo ang mga ligid sa road bike kay it is built for speed alang sa mga lumba. Mas dali masimplang kon di ka anad ini.

Ikaupat, mas mahal ang road bike itandi sa mountain bike kon hisgutan ang base price sa pang-starter nga build. Sa MTB, naay tag P6,000 ra gani nga brand new. Sa road bike, P10,000 up na. Sa P25,000 nga akong nakit-an, labing ubos pa gani nga parts, mao na kini ang presyo sa brand new. Sa MTB, arangarang na nga Shimano series ang nataud ini.

WA MANGAMBISYON Busa, kon duna koy budget sa biseklita, ako na lang i-focus sa pag-upgrade sa MTB inay mopalit kog road bike. Duna say uban nga nagpalit og road bike kay duna silay mga barkada nga maoy nahiligan. Gusto sila nga makakuyog.

I have nothing against road bike. Ako lang gihatag ang rason kon nganong wa ko mopabarog og road bike. Mas hilig ko sa kabukiran, busa MTB ang akong gipili. Kon duna kay igong budget ug ganahan ka sa karsada ug kabukiran, pagpabarog og duha. Ayaw lang sab palabi to the point nga mangutang ka. Kini ra bang gana nato sa biseklita, kon di kapugngan, makabuslot og bulsa.