My New Year’s Resolution
Well, for me it’s the same way to accept Ritchel. Giisip kong napugos ko sa pagsugot niya, parehas sa nangagi kong mga boyfriend. Unsaon man gud, mapugsanon man sab sila. “Kita na ha, Joanna?” Sa tingog ni Ritchel morag naa pa niya ang pagduha-duha. Tug-anan ko unta siya sa tinuod nga gisugot ko lang siya kay nabalaka ko nga mogawas na sab si Tiya Jenny sa iyang kuwarto ug mahibaw-an niya nga nakig-estorya gihapon kog lalaki, nga gisugot ko siya aron mohunong na siyag sigeg tawag nako sa selpon.
But I realized ngano man sab diay kon gidawat ko ang gugma ni Ritchel total, di man sab siya magdugay sa akong kinabuhi. Buwagan ko man sab dayon siya.
“O lagi. Sige na, Rits, Gudnayt na. Katulgon na kaayo ko, uy.”
“Sige. Gudnayt sab. Love you.”
Wa ko na tubaga si Ritchel. Gi-off ko ang akong selpon aron mahunong na ang among pag-estoryahay ni Ritchel sa selpon. Nakaginhawa kog luag. Porbida sab ni si Ritchel, uy, ipamugos gyud ang iyang kaugalingon nako, nakasugot na lang nuon ko niyag di oras! Nagyawyaw ko sa hilom, dayon kong sulod sa akong kuwarto.
Wa sa akong hunahuna ang paghasol sa akong kaugalingon tungod lang sa lovelife. Para namo ni Tiya Jenny, love is a monkey business. Nahikatawa ko nga mao rang usa samtang naghunahuna ani. Lawom nang gabii niadtong tungora. Dali ra kong nakatulog.
“O, ingon ka mag-usab ka na, Joanna, ug mao ni ang imong New Year’s Resolution?”
Dako kaayo og katawa si Vicky dihang nagkaestoryahay mi. Mituyo gyud siya pagduaw nako. Ingon mi ani kasuod. Usahay ako ang moadto sa ila aron magka-bonding lang gyud mi. Nagyaka mi sa berdeng Bermuda sa lawn sa balay ni Tiya Jenny. Nagkalingaw mig inom sa gitempla kong Nestea.
“Bitaw unta, uy, Vic. Pero morag naglisod man kog balibad kang Ritchel. Agrisibo man gung tawhana. Sigeg tawag nako sa selpon bisag gabii na kaayo. Na, nasuko na gani si Tiya.”
“Mao gyud kaha na ang tinuod nga rason maong gisugot mo si Ritchel, Joanna?”
Mitan-aw og dugay si Vicky nako. Nahibulong ko sa iyang tinan-awan nako. Morag duna kini laing kahulogan.