NA-TKO SA GUGMA
Kon gugma na gani ang molihok, lisod nang masagang, mapugngan pa ang mga kumo sa kaaway.
Sama kini sa sugilanon sa gugma sa bag-ong magtiayong Jhack ug Dinah Comision-Tepora nga nagsugod lang sa
“Hi” ug “Hello” sa Messenger hangtod nisangko sa altar sa kaminyuon.
Unang nakit-an ni Jhack ang kaanyag ni Dinah sa Facebook
account sa iyang higala nga si Ruel Rosillo, photographer sa Sun.Star sayo ning tuiga.
“Hala gwapa siya oh! Basin model ni kay pang-model man ang iyang profile sa Facebook,” asoy ni Jhack sa Superbalita dihang una niyang nakit-an ang profile picture ni Dinah sa Facebook.
Nagsige og padala og mga mensahe agi sa Messenger ang 22-anyos nga World Boxing Organization (WBO) Inter-Continental featherweight champion pagpadayag sa iyang gibati ngadto kang Dinah.
Sa sinugdanan, dili pa interesado ang 27-anyos nga dalaga kang Jhack niadtong higayona kay usa kini ka boksidor ug lab-as pa ang kasakit nga iyang nasinati sa katapusang relasyon diin na-engage pa kini ngadto sa iyang kanhi kauban sa trabaho. Motubag si Dinah sa chat
messages ni Jhack paglabay sa lima ka oras ug usahay palabyon ang usa ka adlaw.
Iya gani kini gi-discourage nga siya usa ka maldita nga babaye ug duna nay usa ka anak nga babaye, apan padayon kini nga nangulitawo niya.
Nibilib na kini kang Jhack dihang gituman niini ang hagit nga iyang gipabuhat, ang mananghid sa iyang mga ginikanan nga siya pangulitawhan. “Namugnaw ko ato kay first
time to nako nga niatubang og mga ginikanan sa babaye. Mas lisod pa to siya sa boxing,” saysay sa “El Capitan” dala ang katawa bahin sa iyang unang higayon nga niatubang sa mga ginikanan ni Dinah.
“Wa ko mag-expect nga mananghid siya sa akong mama ug papa. Ako pay nakulbaan para niya,” asoy ni Dinah.
Ang duha opisyal nga nagkauyab niadtong Hunyo 3, 2017.
Niadtong Septiyembre 16, ni-propose ang pambato sa Omega Boxing Stable ug nakuha ang matam-is nga “Yes” ni Dinah, usa ka adlaw sa dili pa kini molarga paingon sa South Africa alang sa iyang labing una nga international fight.
“Desidido ko nga maako siya. Iyang gipa-feel sa akoa nga love gyud ko niya. Wa ko mangandoy nga gwapa akong maasawa pero gwapa ang gihatag sa Ginuo sa akoa, si Dinah,” dugang ni Jhack.
Puno sa inspirasyon, iyang nailog ang title belt isip Inter-continental featherweight
champion sa WBO human gi-technical knock out niini sa ikaduhang round ang South African knockout artist ug kanhi International Boxing Organization featherweight
king Lusanda Komanisi sa ilang kumbati didto sa Orient Theater sa East London, South Africa niadtong Septiyembre 23.
Si Dinah nidugang nga bisan kon kapila siya nasakitan sa gugma, wa siya mobuhi sa iyang pagtuo, nga dunay lalake nga moabot sa iyang kinabuhi ug modawat niya kon kinsa ug unsa siya.
“Nangayo ko sa Ginuo, gidagkot nako sa Santo Niño. Basta dili lang gyud mo-give up,” dugang ni Dinah. /