WARRIORS KAGING
Gipakaging sa Charlotte Hornets ang host Golden State Warriors, 111-100, kagahapon sa National Basketball Association (NBA).
Ang beteranong si Dwight Howard grabe ka nindot og gipakitang duwa ug gipahimuslan kini ni Hornets coach Stephen Silas pinaagi sa pagbabad niini sulod sa korte.
Nimugna og iyang season-high nga 29 puntos si Howard aron pangulohan ang kadaugan.
‘’He was great. I couldn’t take him out in the second half,’’ matod ni Silas kabahin kang Howard.
Ang Hornets ningposte sa ikatulo pa lang nilang kadaugan ning maong season sa duwa nga gipahigayon sa balwarte sa kontra.
Sa kinatibuk-an, ang Hornets ningsaka sa 13-22 nga rekord samtang ang Warriors, nga maoy defending champions, natagak sa 28-8 nga rekord apan nagpabilin gihapon kini sa overall leadership.
‘’They’ve had a tough go this year,’’ asoy ni Warriors coach Steve Kerr kabahin sa Hornets. ‘’They came in and earned it. They took it to us.’’
Nanghinaot si Silas nga kining dalaygong kadaugan batok sa usa sa labing gikahadlukang puwersa makahatag kanila og dugang moral sa pagpadayon sa ilang kampanya.
‘’To get this win here against this team the first game of the road trip means a lot. Hopefully, we can carry that forward,’’ asoy ni Silas.
Gawas kang Howard, kinsa aduna sa’y 12 rebounds ug pito ka assists, ang Hornets aduna pa’y dugang lima ka mga magduduwa nga ningmugna og dobleng numero nga puntos.
Nidugang og 16 puntos si Kemba Walker alang sa Hornets, niamot og 15 puntos si Nicolas Batum, nitampo og 14 puntos si Frank Kaminsky, nihatag og 12 puntos si Michael Kidd-Gilchrist samtang nitunol og 11 puntos si Jeremy Lamb.
Ang Warriors, nga padayong nagduwa nga wala ang usa sa ilang mga pambato nga si Stephen Curry, gipangulohan na sab ni Kevin Durant pinaagi sa iyang 27 puntos samtang nihatag og 24 puntos si Klay Thompson.
Sa laing mga duwa, ningdaog ang Washington Wizards batok sa Houston Rockets, 121103, Toronto Raptors batok Atlanta Hawks, 111-98, Brooklyn Nets batok Miami Heat, 111-87, Chicago Bulls batok Indiana Pacers, 119-107, Dallas Mavericks batok New Orleans Pelicans, 128-120, Milwaukee Bucks batok Oklahoma City Thunder, 97-95, Phoenix Suns batok Sacramento Kings, 111101, ug L.A. Clippers batok LA Lakers, 121-106.