200 ka barangay nga ‘drug-cleared’ ang target
Dugang 200 ka barangays sa lalawigan sa Sugbo ang tinguha sa Cebu Provincial Anti-Drug Abuse Office (Cpadao) nga madeklarar nga drug-cleared karong 2018.
Si Carmen Remedios Ivy Durano-Meca, pangu sa Cpadao, nibutyag nga nakaduso na sila og dugang 23 ka mga barangay nga madeklarar nga drugcleared sa Oversight Committee nga gipangulohan sa Philippine Drug Enforcement Agency (PDEA) niadtong Nobiyembre sa miaging tuig.
Apan wa pay opisyal nga deklarasyon alang sa maong mga barangay kay kinahanglan pa kini i-deliberate sa mga miyembro sa komitiba nga gilangkuban sa PDEA, Department of Health, Philippine National Police, Department of Interior and Local Government ug Cpadao.
Matod ni Meca, kinahanglan pa nga susihon sa DOH ang gipatuman nga mga community-based treatment program sa maong mga barangay samtang tan-awon usab sa PDEA kon duna ba kini high value targets.
“Ang makadugay gyud ana kay DOH because they need to make sure that the community-based treatment program that is running in that barangay is based on the compliance of the DOH framework on the community-based treatment program, kay ang DOH man gyud maoy mo-certify,” pagpasabot ni Meca.
Ang 23 ka mga barangay nagagikan sa mga lungsod sa Alegria, Medellin, ug San Remigio ug dakbayan sa Danao.
Ang papel sa Cpadao mao ang paghimo sa onsite validation ug hugot nga koordinasyon uban sa ubang mga miyembro sa komitiba.
Sa kasamtangan, 160 na ka mga barangay ang nadeklarar nga drug-cleared sa Oversight Committee uban sa dakbayan sa Bogo.
Apan, lima niini ang gipadad-an og suwat ug gihatagan og 30 ka adlaw sa PDEA paghimo og aksyon base sa parameters sa Dangerous Drugs Board diin dunay mga drug personality ang nibalik o dunay bag-o sa ilang barangay.
Aron mahimo nga drugcleared ang usa ka barangay kinahanglan nga iduso kini sa barangay anti-drug abuse council ngadto sa hepe sa kapulisan sa lungsod o siyudad.