Talisay Police mihangyo nga sa Martes magparelibo

Mihangyo karon ang kapulisan sa Talisay nga unya nalang sa Enero 9, adlaw nga Martes, relibohan ang ilang 12 ka mga pulis aron usab way vacuum sanglit sa maong adlaw mabalik na usab ang uban nilang mga kaubang pulis nga nipahimulos sa New Year's break.

Samtang gihimakak usab ni P/Insp. Inar Vic Florece, ang deputy chief sa Talisay Police Station, nga gawas sa 12 ka mga pulis aduna pay laing unom ka mga pulis ang gikatakda usab nga marelibohan sa katungdanan.

Nasayran nga kagahapon, migawas ang order nga nagrelibo sa 12 ka mga pulis nga wa diha atol sa pagbisita sa pangu sa Cebu Provincial Police Office (CPPO) nga si P/SSupt. Edgar Alan Okubo niadtong Disyembre 30 sa hapon.

Hinungdan nga gimandoan sa pagparelibo sa katungdanan ug ipailawom sa usa ka re-traning ingon man seminar.

Matod ni Florece nga samtang wa pay napuli ug wa pa usab mabalik ang ubang mga pulis sa ilang bakasyon ilang gihangyo nga unta sa sunod semana nalang kini ipatuman.

Kini tungod kay mosamot ang ilang problema kon makuhaan pa sila og mga pulis mosamot nga maapektohan ang ilang trabaho.

Nagkanayon si Florece nga adunay miscommunication nga nahitabo hinungdan nga adunay 12 ka mga pulis ang wa makabalik sa dihang gipa-report og balik.

Hinungdan nga kagahapon aduna nay contact number ang tanang pulis sa Talisay aron dali ra silang matawag kon gikinahanglan.

Si Florece miingon nga ilang gihimo ang tanan aron makahimo sila sa ilang trabaho, samtang nahibaw na ang ilang hepe nga si P/Supt. Jason Villamater sa hitabo kinsa padayon karong nagbakasyon.

Si Florece miingon nga sa pagbalik sa ilang hepe daan na kining miingon nga iyang sulbaron ang kontrobersiya nga nahitabo sa iyang police station.

Usa ka pulis nga wa lang magpaila miingon nga nataymingan lang sila nga gibisita sila sa ilang labaw tungod kay ang nahitabo sa ilang police station nga nanguli ang mga pulis nga off duty mao man usab kini ang nahitabo sa ubang police station.