12 PULIS DILI NA MAKABALIK SA TALISAY CITY

Posible di na makabalik sa Talisay Police Station ang 12 ka mga pulis nga gipangrelibuhan sa puwesto, sumala sa usa ka opisyal sa Cebu Provincial Police Office.

Si P/Supt. Jaime Quiocho, Jr., deputy director for administration sa CPPO, nibutyag nga anam-anam nga ilisan ang 12 ka mga pulis.

Matod niya nga magkuha sila og mga pulis sa ubang police station sa kalungsuran o siyudad nga sobra ang personnel, mahimo usab sa Provincial Public Safety Company o sa Personnel Holding Administrative Unit (PHAU) aron maoy ipuli sa 12 ka mga pulis.

Si Quiocho niingon nga nag-amping sila sa ipuli nga mga pulis sa dakbayan sa Talisay kay basin og madungagan na hinuon ang problema.

“Kailangan lang nag-iingat tayo kasi nga baka magdala tayo doon sa Talisay ng kapalit ‘yun pala may problema,” pahayag sa opisyal sa pakighinabi sa mga tigbalita sa Kapitolyo kagahapon.

Ang 12 ka mga pulis ipaubos og balik sa orientation sa beat patrolling ug posible patabangon sa pag-man sa dagan sa trapiko.

“That’s the purpose they will be undergoing orientation on beat patrolling. After that ma-reredeploy ulit sila,” dugang ni Quiocho.

Siya ang usa sa mga opisyal nga nitambong sa tigom nga gipatawag ni Gobernador Hilario Davide III sa Kapitolyo aron masolusyonan ang suliran sa dagan sa trapiko sa lungsod sa Minglanilla ug siyudad sa Talisay.