Wa makolekta nga mga basura sulbaron

Buot tutokan ni acting kapitan sa Brgy. Labogon Amado Manatad nga mahatagan og solusyon ang problema sa basura sa barangay nga pila na ka buwan nga wa makolekta ug maswelduhan na ang kapin sa 100 ka kawani sa barangay nga wa pa maswelduhi sud sa pito na ka buwan.

Kini maoy buot himuon ni Manatad karon nga pormal na nga gi-turn over kaniya ang barangay hall ni suspendidong kapitan Renato Suson nga nalambigit ang pangalan sa “ghost deliveries” sa materyales sa Material Recovery Facility (MRF).

Nahitabo ang turn-over sa mga yawe, tseke, ug buhatan kagahapon sa buntag uban sa presensiya sa City Legal Office, Department Of Interior and Local Government (DILG)-Mandaue ug kapulisan.

“Mapasalamaton ko nga nahitabo na ni karong adlawa kay hilabihang sakripisyo ug hilabihang pag-antos sa atong mga katawhan dinhi sa Labogon tungod kay ang basura diri sa atong barangay naghitak. Gusto nako nga makakupot sa yawi nga ilang iturn-over sa mga dump truck ug drayber aron mahapsay na ni atong barangay nga gipangandoy sa atong katawhan,” matod ni Manatad dihang nahinabi sa mga tigbalita.

Dugang niya nga iyang tinguhaong makadawat na sa pito ka buwan nga sweldo ang mga kawani sa City Hall nga wa nay magpautang nga tindahan.

“Usa sa akong katuyuan nga ma-turn over na ang tseke aron maswelduhan na ang mga tawo nga dugay na nag-antos kagutom kay wa nay mga tindahan magpautang kay ang mga tindahan. Akong pasalig sa mga kaigsuonan sa Labogon nga paningkamutan ko ning adlawa gyud o sa sunod semana nga makasweldo na gyud ta aron matambalan ilang kagutom ug mabayran ilang mga utang sa tindahan,” batbat ni Manatad.

Si Atty. James Allan Sayson sa City Legal Office nagkanayon nga nalangay ang turn-over ni Suson ngadto ni Manata tungod kay wa magkasabot ang duha ka partido sa angay buhaton.

Sud sa sa ka semana human gihatag ang suspension order, si Manatad didto una sa iyang panimalay nagbuhatan og namirma sa mga dokumento tungod kay matod pa wa mihawa sa barangay hall si Suson apan sa habig sa suspendidong kapitan, nagpaabot lang kining Manatad.