Kon di mohunong ang uwan mobakwit dayon

Nipahimangno ang Mandaue City Disaster Risk Reduction and Management Office (CDRRMO) sa mga residente nga nanimuyo kilid sa sapa ilabi na sa may Butuanon nga mobakwit dayon kon way hunong ang uwan ug di na paabuton pa nga mosud ang tubig sa mga panimalay.

Matod ni Carlo Cabahug sa CDRRMO nga kini maoy ilang nakita nga angayang usbon nga pamatasan sa mga residente panahon sa kalamidad.

Kahinumduman nga anaa sa 200 ka balay ang apektado sa baha sa Brgy. Paknaan ug Casuntingan human ni-overflow ang sapa sa Butuanon sa dihang nasinati ang gikusgon ni bagyong Agaton niadtong Enero 2.

Atol sa insidente, gipahimangnuan sa kagamhanan sa dakbayan ang mga residente nga mobakwit apan man gipili niini nga magpabilin sa ilang mga balay.

“Base sa nakita nga nahimo nga problema nato ato is ang atua lang gyud cooperation sa mga tawo, if maglisod, mobakwit na, di nalang gyud mopaabot pa. Sa panahon nga makita nila nga delikado ang baha sa ilang area, pwede na sila mo-evacuate kay naa naman tay designated evacuation areas,” matod ni Cabahug sa dihang nahinabi sa mga tigbalita.

Dugang niya nga hatagan sab og konsiderasyon sa mga residente ang barangay disaster response team nga aduna nalakip ang pamilya sa naapektahan.

Padayag ni Cabahug nga kon nabalaka sa mga gamit ang mga pamilya, binlan lang niini og usa ka miyembro sa pamilya ang balay aron mobantay sa mga butang.