Balaod alang sa mga batig nawong?

Sa kadaghan sa problema sa nasod, kini pa gyung pagpapasar og balaod nga nagprotehir sa mga bati kuno og nawong apan kuwartahan, mao pa gyuy nahunahunaan ni Speaker Pantaleon Alvarez nga buhatan og balaod. Buot niya ipasabot nga kadtong mga bati og nawong nga dali rang minyo-an tungod lang sa bahandi ug sa katiguyanan ug dili tungod sa gugma.

Niini mopalabang siya og balaod nga kon minyo-an man gani ang adunahan nga batig nawong, dili matandog ang katungod niini sa pagpanag-iya sa iyang propriyedad.

Sa laktod nga pagkasulti, bisan pa og nangaminyo na, kon unsay kang Pedro kang Pedro ra gyud na ug unsay kang Petra kang Petra ra sab na.

Ug sa higayon nga magkabuwag na sila, dili na kuti ang binahinay sa ilang kabtangan ug magpabilin ra man gihapon sa matag usa kanila ang ilang kaugalingong bahandi. Dili mapahimuslan sa lain ang hinago-an sa usa.

Mao kini unod ug katuyo-an unya ubos sa Civil Union Bill nga gustong ipalabang ni Alvarez.

Dunay gamayng punto kining maong balaodnon, pero daw sa naghubit kini og diskriminasyon. Kinsa may modesisyon nga kana siya batig nawong?

Gawas niini, sa Revised Family Code sa Pilipinas ang mga magminyo gihatagan og katungod nga maghimo og Marriage Settlement o Pre-nuptial Agreement nga susama ra gihapon og katuyo-an ning maong bill ni Alvarez.

Sa ato pa, duplikasyon ra ning iyaha ug naglangay-langay lang ni sa panahon sa Senado.

Mao nga mas maayo pa igahin na lang unta ni Alvarez ang iyang panahon sa pagsulbad sa mga nag-unang problema sa nasod nga may dakong kalabutan ang publiko.