Nagsakit nga relasyon

Nanuktok tungang gabii si Wenna (tinuod ngalan gitago), hubag ang mata segi’g dangoyngoy og hinilak kay gibiyaan sa iyang bana nga nakig-puyo sa batan-ong estudyante.

Subo palandungaon apan si Wenna usa sa mga daghang asawa nga ingon ini og sitwasyon kay lagi riyalidad naman sa ato ang ‘machismo image’ nga pabor sa mga lalaki. Gani, nadawat na sa kadaghanan kining imahin nga kung ang lalaki mangabit ok lang kay kini makapa-macho man apan pwera sa mga babaye.

Way bisag usa nato ang dunay katungod manghusga labi na kung wa kitay kasayuran sa tinubdan o kabangka-agan sa mga panghitabo nga maoy naka-ingon sa pagluib ug pag-biya.

Matod sa Readers and Digest Health kining mosunod maoy kasagarang rason nganong mibiya ang mga pares pamasin nga ang maka-basa ini maka-relate, makapanamin sa kaugalingon, makapanghinuklog, ug maninguhang mag-usab para matambalan ang nagsakit nga relasyon.

Una ang kinaiya nga ‘BilMoKo’ kon ‘Bili Mo Ako’. Imbis ang kwartang hinaguan ibayad unta sa kuryente, tubig, tuition, abangan sa balay ug pagkaon, gihurot hinuon og shopping og mga sinena, sapatos, make-up o ubang mga gamit para sa kaugalingon.

Ikaduha ang pag-kompetensiya, pagpang-hawod ug paglabwanay. Kanunay magbuot unya ang pares wa nay kagawasan, di na ka-tingog, hangtod mapuno ug manluod.

Ikatulo ang pagka-katag ug hugawan. Way pares kansa gikapoy gikan sa trabaho ang gustong mo-uli sa balay nga baho, hugaw ug nagkalandrakas. Makatabang kung ang pares limpiyado, dunay kahibalo ug kugihan.

Sunod ang pagka-nagger. Di pa gali ka tubag si mister, usa ka kilometro na ang litaniya sa tagaw-taw ni misis.

Ang pagka-libakira, himantayon ug tsismosa labi na kung iladlad ngadto sa katilingban ang mga pribadong sekrito sa pagpuyo lakip ang sex life.

Pagpangabubho nga wa sa lugar. Abtik mangukoy ug mamasa sa mga text messages, e-mail, o FB messenger.

Katapusan ang pisikal nga pagpanapat sama sa kambras, patid, sagpa, sumbag, kumot apil ang pang-guba ug labay og butang.