Gilihian og bagyo
Tungod sa bagyong Agaton daghan nako og nadungog nga mga estorya nga ang tuig 2018 hasulon og daghang bagyo.
Ang ilang katarungan kay nalihian og bagyo ang bagong tuig. Pastilan. Ang akong pagtuo mga lingin nga prutas, pagkaon ug lingin lingin nga sipra sa mga senina ra’y ipalihi pagsugat sa bag-ong tuig. Apil man sab diay si Agaton. Kadto diay’ng gikuso kuso ta ug maayo ni Nitang, Ruping ug Yolanda gilihian sab diay ta og bagyo.
Pero ang giingon diri nako sa porter sa Pier 1, may bagyo ug wala kung ang atong di magkugi di gyud ka kaon. Sakto. Lihian ta ug bagyo o dili kung magtinapol lang gihapon ta way maayong padulngan kining tuiga sa atong kinabuhi.
STRANDED Naghisgut man gyud ta og Pier 1, unsa may kalainan niining mga na-stranded nga pasahero nga nabiktima ug katalagman? Nangutana ko kay matag isa sa signal pinaagi sa Pag-asa daghang pasahero ang mapagan.
Bisan gale warning lang gani daghang pasahero ang mahasol. Di lang sa ilang pagka tulog lakip na ang ilang pagkaon. Samot na kung ang imong budget para pamilite ra.
Busa kusganon natong isugyot sa nasudnong kagamhanan nga sa matag higayon nga dunay kausaban sa dagan sa panahon nga mopugong sa mga barko sa paglawig, automatic na unta nga atimanon sa Deoartment of Social Welfare & Development kun DSWD ang pagkaon sa mga stranded nga pasahero diha sa mga pantalan.
Siguro kadtong may mga paryente nga kapasilongan di na magtagad niini. Ang mga way ka dangpan nga paryente maoy looy kaayo. Maayo ra ba unta ug ma-stranded lang ug tunga sa adlaw.
Ang kasinatian ni Urduha, Vinta ug Agaton nagpahinumdum nato nga samtang naglipay lipay ta uban sa lamian nga pagkaon pagsugat sa Pasko ug bag-ong tuig, dunay daghan sa atong mga kaigsoonan nga natanggong sa mga pantalan ang nagkutoy ang tiyan.
Mga bata ug senior citizen luoy kaayo didto. Matod ni Lolita Duazo usa sa nagdumala sa Help Desk sa Cebu Port Authority sa Pier 1 daghan ang nidangop niya ug nagpakitabang kay gigutom. Ang uban nisumbong niya nga namaligya nalang sa dala nilang manok ug lagutmon aron may ika sustiner pagpalit og pagkaon.
Ambot og nganong nataligam-an sa gobyerno kining maong panginahanglan. Kung magpabakwit bitaw og mga molopyo nga nagpuyo daplin sa dagat ug sapa may itunol man nga pagkaon.
Masunugan og bisan unsa pa nga katalagman may pagkaon man nga iapod apod ang
city hall o munisipyo. Busa awhagon nato ang atong mga lider nga usbon nato ang panagway sa atong mga pantalan.
Himoon nato kining mahigalaon pinaagi sa pagpadayag sa atong simpatiya sa mga ma-stranded nga pasahero.