My love is your love
Nagkuyog mi si Mona sa paggawas sa univeristy nga among gitunghaan. Nagkadungan mig gawas sa main gate kay parehas man mig oras sa katapusan namong subject sa hapon bisag lainlain ang kurso nga among gikuha.
Best friend ko si Mona since high school days namo. Silingan ra mi sa gipuy-an namong subdivision sa Banawa. Parehas ming bugtong anak nga babaye. Ang nakalahi lang namo kay upat silang magsuon samtang kami, duha ra. Ako ang kamagwangan ug ang akong manghod nag-eskuwela pa sa hayiskol.
“Musta na mo si Ruben, Sandra?”
Nanglabang mi si Mona niadtong tungora sa atbang kay ato man mi mag-atang og sakyanan sa among pagpauli.
“Well, as usual smooth ang among relationship.” Gipahiyoman ko si Mona. Gusto kong ipabatyag niya nga malipayon ko sa among paghigugmaay ni Ruben. “Si Roman, musta na sab siya diha nimo?”
Kalit nga nanghupaw si Mona. Mitan-aw siya sa unahan, kaha naglantaw sa dyip nga angay namong sakyan.
“Gi-basted ko na siya, Sandra. I don’t want him to pursue his love. Mentras sayo pa, angay na siyang makahibawo nga wa koy gusto niya.”
“Anugon. Buotan ra ba si Roman.”
Gipara ni Mona ang dyip depasaheroan nga adto mopaingon sa among gipuy-ang subdivision. Nagtupad mig lingkod sa amo nang pagsakay. Klasmet namo ni Mona si Roman gikan sa first year high school hangtod na sa among paggradwar. Dihang third year high school na mi, nagpakita nag motibo si Roman nga nakagusto siya kang Mona. Diha na mangulitawo og pormal si Roman kang Mona dihang third year college na mi.
Samtang si Ruben schoolmate namo ni Mona sa hayiskol. Nakamatikod ko nga hilom nga nakagusto si Mona kang Ruben. Apan dihang nag-eskuwela na mi sa second year college, ako ang gipangulitawhan ni Ruben. Ug kay daan sab kong may hilom nga gugma niya, aw, ako dayon siyang gisugot.
Pagkahibawo ni Mona nga trato ko na si Ruben, morag wa siya sa iyang kaugalingon nga mibiya nako. Wa gani niya hutda ang hopia ug softdrinks. Diha mi niadtong tungora sa canteen, nagesnak mi kay vacant period man namo.
Naluoy ko sa akong best friend. Wa siyay tingug-tingog sa akong tupad.