500 KA KAHOY GIPANGTANOM
Kapin 200 nga delegasyon sa mga tinun-ang sa basic education, ug ingon man ang ilang mga ginikan ug magtutudlo sa Don Bosco Technical College (DBTC) nananom og 500 ka mga kahoy sulod sa buffer zone sa Taiheiyo Cement Philippines, Inc. (TCPI) sa compound niini sa San Fernando, Cebu.
Mikat-on sab sila sa paghimo’g semento, ug mitan-aw sa maong planta sa semento sa Barangay South Poblacion diin sila nangadto ni’ng bag-o pa lang sakay sa mga bus gikan sa DBTC campus sa Punta Princesa, Cebu City.
Mihangop si Masahiro Tate, Jr., technical adviser sa kompanya, sa mga Bosconian ug sa ilang mga ginikanan nga gipanguluhan ni Cerwin T. Eviota , presidente sa Parents Teachers Community Association (PTCA), nga consultant sab sa TCPI.
Si DBTC technical director Ranilo “Tata” Camacho, nga mao sab ang assistant principal alang sa senior high school, mao sab ang nangulo sa mga magtutudlo ug pipila ka mga student leaders.
“Nalipay kami nga magkaabag ta sa pagpaginhawa’g balik sa atong Mother Earth pinaagi sa pagpananom og mga bag-ong kahoy nga kami sa Taiheiyo ug Solid Earth mopasalig nga among galmon harun makatubo ug moda- ko,” nagkanayon si Tate.
Gipaila ang delegasyon sa TCPI ug Solid Earth Development Coirp. (SEDC) ug gipasabot sa proseso sa paghimo’g semento gikan sa pagmina’g materyales hangtud sa paghatod sa mga nahumang produkto sa semento.
Gipasabot sab sila sa bili sa pagpadako’g kahoy ug sa hustong paagi sa pagpananom nga gibuhat nila pagkahuman sa luyo ra’ng bahin sa junior staff house sa habagatang bahin sa TCPI compound.
Nagsul-ob og camisa chino ug kalo, ug sangkap sa mga gamay’ng pala, gitanom nila ang 200 ka mga Siko Carabao ug 100 nga Kapi nga mga kahoy nga mamunga, ug laing tag-100 sa mga endemic specie nga Lawaan ug Lanutan. Human sa 30-minuto nga pagpabugnaw, mitan-aw sa duol ang delegasyon sa pipila nga bahin sa planta, ug midiretso sa roof deck sa admin building sa ibabao nga bahin diin nila nakita ang tibook planta sa semento.
Migiya nila si Eliza C. Olarte, deputy division manager for human resources and administration (HRA) sa TCPI, ug general affairs officer Vanessa N. Bongcawil. Mao sab sila si Eng’r. Romeo M. Gebilaguin, environment and safety division manager, ug sa iyang luyoluyo nga si Dwight P. Avila nga mitanyag sa teknikal nga pagpasabot.
Miabag sab sila si Mitzie I. Carin, HRA division manager sa SEDC, ug sa iya sa’ng luyoluyo ug kasamtangang community relations officer nga si Gines Boltron.
Misilbing marshals sa maong educational tour ang upat ka mga PTCA trustees nga sila si Lani de Leon Tan, luyo-luyong pangulo alang sa high school; tresurera nga si Anna Lee Sol Sanchez, auditor nga si Dr. Merah Hernane, Ed.D. ug sports committee chair nga si Eng’r. Carlito T. Jubac.