Cebu City Sinulog Cup basketball invitational andam na mosikad

Andam na ang tanan alang sa pagpahigayon sa 2018 Cebu City Sinulog Cup Basketball Invitational nga gikatakda karong Enero 8-13 sa Cebu Coliseum.

“All systems are go,” opisyal nga pamahayag sa nagpasiugda sa torneyo nga si Cebu City councilor Jerry Guardo, Committee for Youth and Sports chairman sa konseho.

Upat ka teams sa Sugbo ug usa sa Manila ang magkombati sa kompetisyon.

Ang bugtong gikan sa Manila mao ang Marinerong Pilipino, usa ka miyembrong team sa PBA D-League.

Samtang ang upat ka teams sa Sugbo mao ang University of Cebu/M.Lhuillier Webmasters, University of the Visayas (UV)/SG-ARQ Builders, University of San Jose Recoletos (USJ-R) Jaguars ug Cebu Landmaster/Bogo, nga representahan sa University of San Carlos (USC) Warriors.

Gipadayag na’ng daan ni Guardo nga nakahunahuna siya pagpasiugda ning maong torneyo aron buhion pagbalik ang basketball commercial league sa Sugbo.

Ning puntoha, nagkanayon si Guardo nga naghinamhinam na siya sa pagpahigayon sa torneyo.

“We’re excited, and as a former basketball team manager myself, we saw that there was a need to do something especially for those looking for basketball activity after and on top of the college scene,” dugang ni Guardo.

Ang teams mosubay sa single round-robin elimination unya ang mopatigbabaw nga duha mao ang magsangka alang sa finals samtang ang magsunod nga duha ka teams mag-ilog sa ikatulong dapit.

Aron pag-agni sa publiko, ang mga nagpasiugda nakahukom sa pagpaubos sa presyo sa tiket diin mapalit lang sa tag P10, P20 ug P30.

Ang duwa sugdan matag alas 4:30 sa hapon gikan sa adlawng Lunes hangtod na sa Sabado.

Si Rico Navarro, ang commissioner, mibutyag nga ang tournament ubos sa supervision sa Samahang Basketball sa Pilipinas (SBP).

Aron usab paghatag og kaangayan, aduna usay mga referees gikan sa Manila nga mo-officiate. Adunay photo contest alang sa mga media. Ang kampiyon sa torneyo makabulsa og P75,000, makakuha og P50,000 ang 2nd placer, P30,000 sa 3rd placer ug P20,000 sa 4th placer.

Gikatakdang moabot ugmang adlawa ang Marinerong Pinoy nga ubos sa pagdumala ni coach Koy Banal.