WARRIORS, OKC NAGMADAUGON
Gipabulhot sa defending champions Golden State Warriors ang ilang opensa sa hinapos nga bahin sa 4th quarter aron lupigon ang host Houston Rockets, 124114, kagahapon sa kombati sa mga lider sa Western Conference sa National Basketball Association (NBA).
Ang Warriors, nga ningsaka sa 31-8 nga rekord, gipangulohan ni two-time MVP Stephen Curry pinaagi sa iyang 29 puntos samtang ang iyang kauban sa gitawag og Splash Brothers niamot og 28 puntos.
Maayo sab nga nakaduwa alang sa Warriors si Draymond Green, kinsa mirehistro og triple-double nga 17 puntos, 14 rebounds ug 10 assists. Si Green maoy ang franchise leader sa Warriors sa padaghanay og triple-doubles diin nakahakot na siya og 21.
Ang duha ka mga kampo parehong ningkombati nga wala ang usa sa ilang mga pambato nga pulos adunay angol. Wala nakaduwa sa Warriors si Kevin Durant samtang wala sab sa Rockets si James Harden.
Ang Rockets, nga ningdakin-as sa 27-10 nga baraha, gipangulohan ni Eric Gordon pinaagi sa iyang 30 puntos, nitampo og 29 puntos si Gerald Green lakip na niini ang walo ka three-point shots samtang nidugang og 28 puntos si Chris Paul.
Wala naglagyo ang duha ka mga kampo hapit sa kinatibuk-ang duwa gawas lang dihang nakamugna og lima ka sunodsunod nga puntos ang Warriors nga naghatag kanila og 12 puntos nga labaw sa 120-109 nga labaw sa hinapos nga bahin.
“We’ve got to get better as a team,” matod ni Houston coach Mike D’Antoni. “We’re just not quite there defensively, communication, all the stuff we can control we’re not doing.”
Nagkanayon si Thompson nga wala dayon naka-adjust ang Rockets sa pagpadaplin sa ilang lider nga si Harden ug mao kini ang ilang gipahimuslan.
“Obviously they were missing their best player without James so we felt like there was an opportunity for us,” asoy ni Thompson.
THUNDER 127, CLIPPERS 117
Samgtang sa Los Angeles, gimugna ni Russell Westbrook ang iyang ika-13 nga triple-double ning maong season aron tabangan ang Oklahoma City Thunder sa pagpukan sa host Clippers.
Si Westbrook nagpakatap og 29 puntos, 12 rebounds ug 11 assists alang sa Thunder, nga gipangulohan ni Paul George pinaagi sa iyang 31 puntos. Nipupo og 22 puntos si Carmelo Anthony aron tabangan ang Thunder.
Ang Clippers gipangulohan ni DeAndre Jordan pinaagi sa iyang season-high nga 26 puntos ug 17 rebounds.
Nimugna sab og 26 puntos alang sa Clippers si Lou Williams samtang nidugang og 24 puntos si Blake Griffin.
Ang Thunder mingsaka sa 22-17 nga rekord samtang ningkanaog sa 17-20 nga baraha ang Clippers.