Lahing Judy Ann Santos sa “Dalawang Mrs. Reyes”
Kon ang titulong “Dalawang Mrs. Reyes” ang atong basehan, morag drama ug bahin sa mistress ang tema sa istorya, pero sa trailer nga atong nakita puno diay sa komedya ang pelikula.
Duha ka reyna ang mag-uban dinhi sa unang higayon nga silang Angelica Panganiban ug Judy Ann Santos Agoncillo. Dili lang sa pagarti kundi sa pagpakatawa.
Si Juday ug Angelica mga devoted wives sa ilang mga bana nga ilang nadiskubre nga mga bayot diay.
Maong mag-uban ang Juday ug Angelica alang sa pagpanimalos nga dili makakuha og happy ending ang ilang mga bana. Dinhi buhaton sa duha nga magpartner para magmalampuson sa ilang mission.
Dihang gi-offer ang maong role kang Juday iya ning gibalibaran kay wala kuno siyay talent sa comedy. Apan na-challenge ang babaye maong iya na lang gidawat.
Makauban nila dinhi si JC de Vera ug Joross Gamboa nga modala sa papel nga ilang mga bana.
Si Joross gikan pa sa malampuson niyang “Deadma Walking” sa MMFF ug karon bading na usab ang iyang papel. May Carmi Martin ug Gladys Reyes pa nga kabarkada nila ug si Andrea Brillantes isip anak ni Juday.
Mao ni opening salvo sa Star Cinema sa 2018 nga siguradong daghang malingaw nga showing karong Jan. 17 sa direksyon ni Jun Lana, ay’g saba!
Gisugdan na gabii ang world class talent search nga “Pilipinas Got Talent” sa ABS-CBN nga masundan matag Sabado ug Domingo sa gabii. Mangandam ta nga masorpresa ug malingaw sa nagkadaiyang mga talento sa mga Pinoy.
Andam na usab ang mga hurado nga silang Freddie Garcia, Robin Padilla, Angel Locsin ug Vice Ganda nga manghimbis uban sa mga host nga silang Billy Crawford ug Toni Gonzaga, ay’g saba!
Katapusang semana na sa teleseryeng “Pusong Ligaw” nga atong ginuntan matag hapon human sa “It’s Showtime.” Unsa kahay mga pasabog sa pagtapos niini? Duna say bag-ong pelikula nga sila gihapong Diego Loyzaga ug Sofia Andres ang bida. Ay’g saba!
Giimbitar nako ang tanan sa fundraising concert karong alas-8 sa gabii, Jan. 7, 2018 sa Slabadu, H. Cortes Mandaue City. “Jam with Pepito Family and Jacky Chang for the Sinulog” uban sa mga guest May Ann, The Twins, Exclamation ug Joefre. Ang ticket P400 ug P600 sa VIP, diin ang kita mapunta sa Bacayan Sinulog Contingent. Ay’g saba!