Sinulog basketball sugdan karon
Mga duwa karon 4:00 pm- Opening 4:30 pm- UC/M.Lhuillier batok Cebu Landmaster/Bogo 6:15 pm- UV/SG-ARQ batok Marinerong Pilipino
Daw mobangga og lig-ong sementong bungbong ang University of the Visayas (UV)/ SG-ARQ Builders sa ilang pagpakigbatok sa Manila squad Marinerong Pilipino sa main game karong gabii sa pagsugod sa 2018 Cebu City Sinulog Cup Basketball Invitational sa Cebu Coliseum.
Ang Builders, nga gilangkuban og mga magduduwa sa Cebu Schools Athletic Foundation Inc. (CESAFI) champions UV Green Lancers, nagkinahanglang makapagawas og maayong kombati sa kinatibuk-ang duwa aron makaparang sa Marinerong Pilipino.
Ang Marinerong Pilipino, nga maoy bugtong team gikan sa Manila nga ningsalmot sa kompetisyon, usa sa miyembrong teams sa Philippine Basketball Association (PBA) D-League o mas nailang PBA D-League.
Dili ikalimod nga mas lig-ong ang puwersa sa Marinerong Pilipino apan wala kini nagpasabot nga wala na’y dag-anan ang UV-SG/SRQ.
Sa premirong duwa, magsangka ang University of Cebu (UC)/M.Lhuillier Webmasters batok Cebu Landmaster/Bogo, nga gilangkuban og mga magduduwa sa University of San Carlos (USC) Warriors.
Ang partisipanteng team apan wala pa’y eskedyul nga duwa karon mao ang University of San Jose Recoletos (USJR) Jaguars.
Mosubay ang torneyo sa single round-robin elimination unya ang mopatigbabaw nga duha mao ang magsangka alang sa finals samtang ang magsunod nga duha ka teams mag-ilog sa ikatulong dapit.
Ang kampiyon sa torneyo makabulsa og P75,000, makakuha og P50,000 ang 2nd placer, P30,000 sa 3rd placer ug P20,000 sa 4th placer.
Nagkanayon si Cebu City councilor Jerry Guardo, Committee for Youth and Sports chairman sa konseho, nga ang tuyo ug tumong ning maong torneyo mao ang pagbuhi og balik sa commercial basketball league sa Sugbo./