‘WAY PULIS’ SA ESTASYON SA TOLEDO

NASAKPAN SA PAG-INSPECT SA HEPE SA CPPO

■SINULOG FLOAT.

Usa kini sa angay nga atngan nga talan-awon sa Sinulog Grand Parade, ang dragon nga isakay sa usa sa mga float sa contingents. Gidesinyo ug gihimo kini ni Panjie Pangilinan (nagputi), artist sa Imaginative Concepts, kinsa busy sa pag-andam niini. Sila si Pangilinan ang champion sa Sinulog 2017 sa float category. Ning higayuna, ang iyang obra gi-inspire sa cable tv show Game of Thrones.

Labing minos 10 ka mga pulis sa Dakbayan sa Toledo pasakaan og mga kasong administratiba human naabtan sa hepe sa Cebu Provincial Police Office nga wa sa ilang estasyon atol sa kinalit niyang inspeksyon niadtong Dominggo sa buntag.

Nakurat si Sr. Supt. Edgar Alan Okubo sa iyang pag-abot sa Toledo police station nga sirado ang gate ug pultahan ug way pulis nga nangabli.

Si Okubo gikan nibisita sa Balamban police station aron makisayod unsa na ang dagan sa imbestigasyon sa punisilay niadtong Sabado sa hapon nga ningkalas og duha ka mga kinabuhi.

Nagtuo siya nga nanguli ang tanang police nga duty niadtong tungora busa iyang gitawgan si Supt. Anthony Bagarinao, hepe sa maong

police station aron makisayod asa na ang iyang mga sakop.

Wa dayon makasulod si Okubo ug nag-atang sa gawas kay bisan unsaon pagtawag ang tawo sa sulod, way nitubag.

Nipugos siya sa pagsulod aron susihon kon wa bay nagduty.

“Pumasok ako. Tiningnan ko walang tao eh. Baka nag off lahat. Palagay ko pati admin personnel nag off kaya pinagsabihan ko na ang admin, mag work din Saturday at Sunday ng 12 hours kase uniform eh,” matod ni Okubo.

Apan iyang nasuta nga dunay usa ka pulis apan didto sa luyo dunay gihimo.

Rason sa nag inusarang pulis nga iyang gisira ang gate ug pultahan sanglit siya nag-inusara ug mamiligro kon dunay binilanggo nga moeskapo.

Tungod niini, iyang gimandoan ang Provincial Investigation and Detective Management Branch nga ipaubos sa imbestigasyon ang mga pulis sa syudad sa Toledo nga niadtong tungora nag duty.

Girekomindar sa PIDMB nga ang chief clerk sa police station relibuhan samtang magpadayon ang imbestigasyon human masuta nga way nahimo sa iyang mga sakop nga magdumili sa pagtunga sa police station.

Gisugyot ni Okubo nga ipaubos sa ang maong mga pulis kon mahuman na ang kapulisan sa Syudad sa Talisay.

Ang nahitabo sa syudad sa Talisay ug Toledo maghimo nga leksyon sa tanang police station, matod ni Okubo.

Gihimakak hinuon ni Bagarinao nga wa mo duty ang iyang mga sakop niadtong tungora, naka-deploy sila sa tibuok syudad.

“Naa ra man ang akong mga tawo, naka deploy lang mao tong wala makita ni PD (Okubo),” matod ni Bagarinao.

Apan bisan pa sa pag depensa ni Bagarinao, mag-atubang gihapon ug kasong administratiba ang mga pulis.

Mga kasong neglect of duty, lakip na ang absent without official leave nga ang bug-at nga silot matangtang sa serbisyo maoy atubangon sa mga pulis. /